ArmnewsTV.am-ը գրում է.
Մոսկվայի բիզնեսի եւ իրավունքի ինստիտուտի երեւանյան մասնաճյուղի դռները բաց են` մի քանի ամիս կողպած լինելուց հետո: Լսարաններից գործում է միայն մեկը, բայց միայն տնօրենների ու ուսանողների հանդիպման համար: Ումից ստանալ բուհում հինգ տարի կրթություն ստանալու հավաստագիրը, ուսանողների եւ նրանց ծնողների հարցի պատասխանը միանշանակ չէ:
Մասնաճյուղի գործունեությունը նախորդ տարի է կասեցվել գլխամասային բուհի կողմից` սովորող ուսանողների կրթությունը շարունակելու հարցն ու ավարտածների ավարտական վկայական ստանալու խնդիրը թողնելով օդում կախված:
Բուհի երեւանյան մասնաճյուղի ռեկտորը պնդում է` բուհի գործունեության դադարեցման որոշումը կայացվել է իր ուսանողների ավարտական քննություններից հետո: Եվ ըստ դրա էլ գլխամաս բուհը պարտավոր է` երեւանյան մասնաճյուղի ուսանողներին ավարտական վկայականներ տալ:
Մոսկովյան մայր բուհը պետական չէ, հավատարմագրված է: Ռեկտորն ու պրոռեկտորը հայեր են ու պնդում են մեկ բան` շրջանավարտ ուսանողները դիպլոմ ստանալու համար մեկ տարի անց պետք է վերահանձնեն քննությունները:
Ուսանողների ծնողները կողմերից որեւէ մեկին հավատալ կամ վստահել դժվարանում են ու նույնիսկ հայտարարում` այստեղ խնդիրը միայն անդիպլոմ ուսանողները չեն, միջանձնային խնդիրը` գլխամասային բուհի եւ մասնաճյուղի ղեկավարության միջև է, մեկը մյուսի գործունեությունից տեղյակ չէ:
Խնդիր ունեցող ուսանողները հիսունհինգն են: Կրթության գիտության նախարությունը վստահեցնում է` նրանց կարող է միայն մեկ հարցով օգնել` Հայաստանի ոչ պետական բուհերում կրթությունը շարունակելու հնարավորություն տալով, իսկ դիպլոմ չունեցողներին` նույն բուհերում` ավարտական դիպլոմային քննություններ հանձնելու թույլտվությամբ:
Ուսանողներից` հայկական ոչ պետական բուհերում կրթությունը շարունակել համաձայնել է արդեն վեցը: Մի մասը պատրաստվում է դիմել դատարան` գլխամասային բուհից դիպլոմը ստանալու համար, իսկ մյուսները` դեռ որոշում են հետագա անելիքները:
Տեսանյութը կարող եք դիտել այստեղ