Մերիլենդի ավագ դպրոոցի ղեկավարությունը ոչ պաշտոնական ավարտական արարողություն կազմակերպեց մի աշակերտուհու համար, ում մայրն անբուժելի հիվանդ էր: Այդ աշակերտուհու անունը Մեգան Սագ է: Նա ասել է, որ իր մահամերձ մոր կողքին անցկացված արարողությունը ծանր էր իր համար, սակայն նա միաժամանակ ուրախ է, որ իր մայրը հասցրեց տեսնել, թե ինքն ինչպես է ավարտում Գլեն Բերնի ավագ դպրոցը: Սագերի ընտանիքի անդամները մասնավոր ավարտական արարողություն անցկացնելու խնդրանքով դիմեցին դպրոցի ղեկավարությանը այն ժամանակ, երբ նրանք գիտակցեցին, որ Մեգանի մայրը՝ 48-ամյա Դարլին Սագը, այնքան չի ապրի, որ տեսնի իր աղջկա ավարտական արարողությունը, որը նախատեսված է անցկացնել հունիսի 10-ին:
Վիշտ ու հպարտություն. Մեգան Սագը կանգնել է իր մայր Դարլինի կողքին, մինչ դպրոցի տնօրեն Վիքի Փլիթը անցկացնում է ավարտական արարողությունը:
2010 թ.-ի նոյեմբերին Դարլին Սագի մոտ քաղցկեղ ախտորոշվեց: Մեգանի հայրը՝ Սթիվ Սագը, ասել է.
Ես կարծում էի, թե նա կհաղթահարի հիվանդությունը, սակայն վերջին մի քանի օրերին նրա առողջական վիճակը կտրուկ վատացավ:
Հպարտ ծնողները. Մեգան Սագը՝ իր մայրիկի և հայրիկի հետ
Հարցազրույցներից մեկում Մեգանն ասել է. «Ես զարմացած էի, որ դպրոցի ղեկավարությունն այդքան արագորեն արձագանքեց մեր խնդրանքին: Տնօրենները սովորաբար շատ զբաղված են լինում, սակայն մեր դպրոցի տնօրենը մի կողմ թողեց բոլոր գործերը և աջակցեց մեզ: Դպրոցի ղեկավարությունը շատ սիրալիր գտնվեց մեր նկատմամբ»:
Տնօրեն Վիքի Փլիթը արարողության ընթացքում խոսել է Մեգանի խոստումնալից ապագայի մասին: Ի դեպ, տիկին Փլիթի մայրը նույնպես պայքարում է քաղցկեղի դեմ:
Գեղեցիկ հուշ. արցունքոտ, բայցև ժպտացող Մեգանը ընտանիքի մյուս անդամների հետ լուսանկարվում է իր մոր կողքին՝ իր ավարտական վկայականը ստանալուց հետո: Թեպետ Մեգանը շատ դժվարությունների միջով է անցել, նա ջանք ու եռանդ չի խնայել ավագ դպրոցն ավարտելու համար:
Դպրոցի ղեկավարությունը հայտնել է, որ սա առաջին անգամն է, որ մասնավոր ավարտական արարողություն է անցկացվել մահամերձ հիվանդ ծնող ունեցող աշակերտի համար: Նախկինում նմանատիպ միջոցառումներ անցկացվել են նաև անբուժելի հիվանդ երեխաների համար: Շաբաթ օրը՝ քաղցկեղի դեմ երկարատև պայքար մղելուց հետո, Դարլին Սագը մահացավ:
