Սակուրան բալենու տարածված անվանումն է, որը Ճապոնիայի ազգային սիմվոլն է: Գոյություն ունի սակուրայի ավելի քան 200 տեսակ, ընդ որում, որոշ տեսակներ աճեցվում են միայն դեկորատիվ նպատակներով և պտղատու չեն:
Ճապոնիայում գոյություն ունի ծաղիկներով զմայլվելու ազգային ավանդույթը, որը կոչվում է «հանամի»:
Հեռուստատեսությամբ նախօրոք հայտարարում են Ճապոնիայի տարբեր շրջաններում սակուրայի ծաղկման ժամկետները, և երբ այն ծաղկում է, մարդիկ հավաքվում են այգիներում, պիկնիկներ են կազմակերպում, զմայլվում են հիասքանչ սպիտակ և վարդագույն ծաղիկներով:
Ճապոնիայի հարավային շրջանում՝ Օկինավեում, սակուրան ծաղկում է հունվարին, Տոկիոյում և Կիոտոյում՝ մարտի վերջից ապրիլի սկզբին, իսկ երկրի հյուսիսային շրջաններում՝ ավելի ուշ: Ծաղկման շրջանը մեկ շաբաթ է տևում:
Երկրորդ համաշխարհային պատերազմի ժամանակ ճապոնացիները գրավված երկրներում սակուրա էին տնկում՝ որպես Ճապոնիայի մաս կազմելու նշան: Կորեայում պատերազմից հետո արմատախիլ արեցին հազարավոր սակուրաներ, քանի որ այն ասոցացվում էր ճապոնական օկուպացիայի հետ:
