Armsport.am-ը գրում է.
Հայաստանի հավաքականի նախկին ֆուտբոլիստ Արթուր Պետրոսյանը շատ լավ ծանոթ է Հայաստանի ազգային թիմի նորանշանակ գլխավոր մարզիչ Բեռնար Շալանդին: Պետրոսյանը, ով ներկայումս գլխավորում է «Ցյուրիխի» երիտասարդական թիմը, 2007 թվականին նույն ակումբում աշխատել է փորձառու մասնագետի հետ:
Armsport.am-ի հետ զրույցում, Արթուր Պետրոսյանն այսպես բնութագրեց Շալանդին.
«Շվեյցարիայում Շալանդին շատ լավ են ճանաչում, քանի որ նա մեծ հաջողություններ է արձանագրել այստեղ: Երկար տարիներ հաջողությամբ գլխավորել է Շվեյցարիայի երիտասարդական հավաքականը, ապա ակումբներում է ունեցել հաջողություններ: Եվրագավաթներում նրա գլխավորությամբ եղել են տպավորիչ արդյունքներ:
Ո՞վ Հայաստանի նոր մարզիչը. եթե համառոտ, ապա Բեռնար Շալանդն այն մարզիչն է, ով «Ցյուրիխին» առաջին անգամ դուրս է բերել Չեմպիոնների լիգայի խմբային մրցաշար: Կոնկրետ Չեմպիոնների լիգայում, դա միակ դեպքն է եղել, երբ «Ցյուրիխը» ելույթ է ունեցել խմբային մրցաշարում»:
Օրերս Բեռնարդ Շալանդը հեռախոսազրույց է ունեցել Արթուր Պետրոսյանի հետ.
«Բնական է, նա ինձանից տեղեկություններ հարցրեց Հայաստանի, հայկական ֆուտբոլի մասին: Ես նշեցի, որ Հայաստանի հավաքականը գլխավորելը՝ շատ լավ տարբերակ է: Տրամադրեցի նրան անհրաժեշտ տեղեկություններ՝ մեր երկրի, մեր ֆուտբոլի մասին: Բնականաբար, վերջնական որոշումը Շալանդին էր»:
Արթուր Պետրոսյանը կարծում է, որ Շալանդը կարող է հաջողություններ ունենալ Հայաստանի հավաքականում.
«Նա շատ էմոցիոնալ մարզիչ է, մեծ ապրումներ է ունենում խաղի ընթացքում: Նրա գլխավորած թիմերը հանդես են գալիս կարճ փոխանցումներով, ցուցադրում են հարձակվողական ֆուտբոլ: Ես միայն ուրախ եմ, որ նա է գլխավորելու Հայաստանի հավաքականը: Նա մեծ փորձ ունի եւ բավական երկար ճանապարհ է անցել մարզչական ասպարեզում»: