Այո, երբեմն նորաձեւ իրերն այնքան են տարածվում, որ դառնում են շաբլոն: Մարդիկ, տեսնելով այս կամ այն իրը նորաձեւության ցուցադրությունների ժամանակ, կամ լսելով, որ դրանք նորաձեւ են, կրկնօրինակում են` հաճախ առանց հաշվի առնելու` գեղեցիկ է, թե ոչ, սազում է իրենց, թե ոչ: FashionYan-ն այսօր ընտրել է այդպիսի շաբլոն մի քանի նորարարություններ, որոնք այնքան տարածվեցին, որ կարելի է ամեն քայլափոխի տեսնել:
Եվ այսպես, շաբլոն N1` ծաղիկներով գլխազարդեր: Ամեն ինչի «մեղավորը» Dolce&Gabbana-ն էր, որն իր ցուցադրություններից մեկի ժամանակ ներկայացրեց քարերով, ծաղիկներով, ուլունքներով զարդարված հրաշագեղ գլխազարդեր, որոնք անմիջապես կրկնօրինակվեցին: Որքան էլ դրանք ինձ դուր գան, այնուամենայնիվ, չափից դուրս շատ տարածվեցին եւ կորցրեցին իրենց բացառիկությունը:
Սրան զուգահեռ` նորաձեւություն մտան մեծ ծաղիկներով գլխազարդերը, որոնք նույնպես շատ սիրվեցին եւ տարածվեցին:
Շաբլոն N2` Սնիկերներ: Չգիտեմ, թե այս կոշիկները ստեղծողն ինչ է մտածել, բայց, ըստ իս, դրանք պարզապես սարսափելի են: Իսկ եթե հաշվի առնենք նաեւ այն, որ ամբողջ քաղաքը դրանցից է հագնում, ապա բացասական վերաբերմունքն այս կոշիկի նկատմամբ ավելի է մեծանում:
Շաբլոն N3` ռոք ոճի աքսեսուարներ: Ինձ հատկապես դուր չեն գալիս այս ոճի թեւնոցները` համադրված տարբեր թեւնոցների, գունավոր շղթաների, ժամացույցների կամ նուրբ աքսեսուարների հետ:
Մի կերպ կարող եմ հասկանալ սա, կարող եմ հասկանալ նաեւ ջինսից բաճկոններին մետաղյա աքսեսուարներով ուսադիրների առկայությունը, բայց ոչ մի կերպ չեմ կարողանում ընդունել դրանց համադրությունը նուրբ բլուզների հետ:
Շաբլոն N4` Օձիքներ: Անցած տարի օձիքների իսկական բում էր: Սրանք սիրվեցին նաեւ նրա համար, որ կարելի էր ինքնուրույն շատ հեշտ պատրաստել, նաեւ օգտագործել տարբեր զգեստների հետ: Բայց, ինչպես վերը նշած բոլոր նորարարությունների, այս մեկի դեպքում էլ չափն անցան: Ամենուր կարելի է տեսնել պատեհ եւ անպատեհ կիրառված նմանատիպ օձիքներ:
Եվ վերջում, շաբլոն N5` իմ կողմից սիրված հունական սանրվածքը, որը շատ պրակտիկ է, գեղեցիկ եւ հեշտ ու արագ ստացվող, բայց կրկին չափից դուրս շաբլոն:
