Գոնե «Նիմֆոմանուհուց» խոսողները կամ ֆիլմի պրեմերիա կազմակերպողը ճանաչեին Լարս Ֆոն Տրիեր ռեժիսորին

Անգամ այն մարդիկ, որ գրեթե ֆիլմեր չեն դիտում, վերջին օրերին առիթը բաց չթողեցին աչքի ընկնելու համար՝ «Նիմֆոմանուհի» ֆիլմից խոսելու, դրա մասին ֆեյսբուքյան ստատուսներ գրելու: Ես «համոզված եմ», որ բոլորը՝ թե՛ ֆիլմը բոյկոտողները, թե՛ ֆիլմի պրեմերիան Հայաստանում իբր «կազմակերպողները» ու բազմաթիվ հայկական պոռնո-լրատվական կայքեր լավ տեղյակ են կինոարվեստից, նամանվանդ Լարս Ֆոն Տրիերի կինոարվեստից: Ահա այդ պատճառով կինեմատոգրաֆիայում մեծ ավանդ ունեցող Լարս Ֆոն Տրիերը չափազանց շատ էր նրանց համար:

Ի գիտություն վերը նշված խմբերին`

Ռեժիսոր, դերասան, սցենարիստ, կինոյում «Դոգմա»-ի հիմնադիր Լարս Ֆոն Տրիերը ծնվել է Դանիայում 1956թ.-ին: Լարս Տրիերը «Ֆոն» կոչումը ավելացրել է իր ազգանվանը ուսանողական տարիներին, որն էլ ժամանակին մեծ սկանդալ է առաջացրել: Ֆիլմեր սկսել է նկարահանել 11 տարեկան հասակից, սկզբում դրանք կարճամետրաժներ էին: 1982թ.-ից սկսեց նկարահանել լիամետրաժ ֆիլմեր: Նրա լավագույն ֆիլմերն են համարվում `Դոգվիլլ (Догвилль), Խավարում պարողը (Танцующая в темноте), Ալիքները ճեղքելով (Рассекая волны), Եվրոպա (Европа): Նրա ֆիլմերն ունեն բազմաթիվ մրցանակներ, այդ թվում Կաննի կինոփառատոնի «Ոսկե արմավենի»: 2009թ.-ին մեծ աղմուկ հանեց ռեժիսորի «Հակաքրիստոս» (Антихрист): Ֆիլմը հակաքրիստոնեական չէր, հերոսների արարքներն էին հակաքրիստոնեական: Տրիերն ունի 30-ից ավելի ֆիլմեր:

2011թ.-ին «Ոսկե Ծիրան»-ի շրջանակներում իր «Մելանխոլիա» ֆիլմով Լարս Ֆոն Տրիերը հրավրիվել էր Հայաստան, բայց հրաժարվել էր գալ, քանի որ ինքնաթիռ ընդհանրապես չի նստում:

Ամբողջ աշխարհում, բացի քարանձավային և աշխարհից կտրված երկրներից, Տրիերի ֆիլմերին միշտ էլ մեծ ակնկալիքով են սպասում, նամանավանդ կինոմանները, կինոգետններն ու նրա արվեստի երկրպագուները: Դեռևս 2011թ.-ին մտածված «Նիմֆոմանուհի» ֆիլմի նկարահանումները ավարտվեցին 2013-ին: Արդյունքում ստացվեց 8 ժամանոց ֆիլմ, որի ժանրը առաջին հերթին բնութագրվում է որպես դրամա՝ ըստ կինոկայքերի: Ֆիլմը կրճատվեց՝ հասցնելով 5 ժամի և բաժանվեց 2 մասի: Կցուցադրի հայկական կինոթատրոնը «Նիմֆոմանուհին» թե ոչ, կճանաչի հայ հասարակությունը Տրիերին, թե ոչ` միևնույնն է, Լարս Ֆոն Տրիերի մոտ ոչինչ չի փոխվի, նա էլի մնում է տաղանդավոր, արտասովոր, հանճարեղ ու սպասված: