Ողջույն բոլորին: Վերջապես մի փոքր ժամանակ ունեմ և, թեև ուշացումով, բայց ուզում եմ ամփոփել Բարձր նորաձևության շաբաթը, որը տեղի ունեցավ Փարիզում` նախորդ շաբաթ: Թե ինչ է իրենից ներկայացնում Բարձր նորաձևությունը` նույն ինքը Հոթկուտյուրը, կարող եք կարդալ ահա այստեղ, իսկ հիմա անցնեմ Փարիզի բարձր նորաձևության շաբաթին:
Շաբաթվա ընթացքում աշխարհահռչակ նորաձևության տները ներկայացրեցին իրենց գարուն-ամառ 2014թ. հոթկուտյուր հավաքածուները:
Ցուցադրությունների մեկնարկին ուշադրության կենտրոնում Versace-ն էր: Դոնաթելան այս նոր հավաքածուի մեջ ցուցաբերել է մաքսիմալիզմ՝ կորսետներ, բացվածքներ, փայլ, թափանցիկ կտորներ, սեքսուալություն և զգացմունքայնություն, մետաղագույն կտորներ և մետաքս:
Հաջորդը, ում ցուցադրություններին ուզում եմ անդրադառնալ, իմ սիրելի Chanel-ն ու Dior-ն են:
Christian Dior-ն իր 2014 թվականի գարնանային հավաքածուում ցուցադրեց 52 կերպար, որոնց շեշտը դրված է սևի և սպիտակի, կապույտի, անանուխի գույնի, վարդագույնի և կարմիրի վրա: Հանդիպեցին նաև ծաղկային և սյուրռեալիստական նախշերով լուծումներ, իսկ, ընդհանուր առմամբ, բրենդը հավատարիմ է մնացել իր ոճին և մինիմալիզմին:
Ինչ վերաբերում է Chanel-ին, ապա Կառլ Լագերֆելդը հավատարիմ է մնացել իր ոճին՝ չմոռանալով սեզոնի գլխավոր միտումների մասին՝ թափանցիկություն, պաստելային երանգներ, փայլ և սպորտային ոճ:
Անցնենք Valentino-ի հավաքածուին: Այստեղ գերիշխում էին nude երանգի նուրբ և եթերային զգեստները` համադրված փետուրներով, ժանյակներով: Օպերային թեման հավաքածուի մեխն էր: Ցուցադրվեցին հայտնի իտալական օպերաների շենքերի խճանկարներով զգեստներ, ինչպես նաև` կենդանիների պատկերներով, անիմալիստական ոճի հագուստ:
Իսկ հիմա անցնեք իմ ամենասիրելի կուտուրյեին` Էլի Սաաբին (Elie Saab):
Ինչպես և սպասվում էր` հավաքածուն աչքի ընկավ կանացիությամբ, նրբությամբ և ռոմանտիկությամբ: Սաաբի զգեստները` առանց մեկնաբանության:
