Տաղանդավոր ոսկերիչը, ում աշխատանքները հազարավոր դոլարներ արժեն, պատմել է, թե ինչպես է կարողանում ստեղծել հիասքանչ զարդեր՝ չնայած նրան, որ առանց մատների է ծնվել:
Սոմերսեթ քաղաքում գտնվող իր արհեստանոցում 48-ամյա Աննետ Գեբբեդին նուրբ մատանիներ, ականջօղեր և թևնոցներ է ստեղծում՝ զարդարելով դրանք ադամադներով, ծիածանաքարերով և այլ թանկարժեք քարերով:
Ընդ որում, ոսկերիչը չի օգտագործում ոչ մի հատուկ գործիք և ասում է, որ չի պատկերացնում, թե մատներ ունեցող մարդիկ ինչպես են կատարում նույն աշխատանքը:
«Ես ինձ անդամալույծ չեմ համարում, բայց հասկանում եմ, որ մարդկանց զարմացնում է, որ ես կարող են ոսկերչական զարդեր ստեղծել: Զարդերի ստեղծումը շատ նուրբ աշխատանք է, և մարդիկ դժվարությամբ են կարողանում հավատալ, որ դրանք ես եմ ստեղծել, ինչպես նաև նրանց մոտ բազմաթիվ հարցեր են առաջանում իմ առօրյա կյանքի վերաբերյալ»,- պատմում է Աննետը:
Գեբբեդին ոսկերչություն է սովորել դեռ դպրոցից, որը ավարտելուց հետո ընդունվել է Հատտոն Գարդեն քոլեջ և ոսկերչություն է սովորել Լոնդոնի լավագույն ոսերիչների մոտ: Նա Սոմերսետ է տեղափոխվել 24 տարի առաջ և ներկայումս համարվում է Մեծ Բրիտանիայի լավագույն ոսկերիչներից մեկը:
«Յուրաքանչյուր մարդ ինքն է որոշում, թե ինչպես վերաբերվել սեփական անձին, և ինձ համար բոլորովին սարսափելի չէր այն փաստը, որ առանց մատների եմ ծնվել: Ես երբեք դրանք չեմ ունեցել և սովորել եմ ապրել առանց մատների»,- ասում է Աննետը:
Ոսկերիչը կաշվե թևնոց է կրում, որի վրա ամրացնում է անհրաժեշտ գործիքը: Աննետը խոստովանել է, որ միշտ մեծ սիրով է պատասխանում հետաքրքրասեր երեխաների հարցերին:
«Նրանք պետք է մանուկ հասակից հասկանան, որ դա նորմալ երևույթ է, և որ աշխարհում տարբեր մարդիկ են ապրում»:
Աննետի ստեղծած ամենաթանկ զարդը դեղին և սպիտակ ոսկուց պատրաստված և ծիածանաքարով ու ադամանդներով պատված 18 կարատանոց մանյակն է, որը նա ստեղծել էր իր համար, որպեսզի տոնի իր ոսկերչական գործունեության 21-ամյակը: Այդ զարդն արժե մոտավորապես 40.000 դոլար:
