Ոստիկանությունը լրագրողներին հայհոյած ՀՀԿ-ականների գործից «նորություն չունի»Epress.am-ը գրում է.

Դեռևս անցյալ տարի՝ 2013 թվականի դեկտեմբերի 26-ին, Ոստիկանությունը Epress.am-ին հայտնել էր, որ «ուսումնասիրություն է սկսել» Տնտեսագիտական համալսարանում տեղի ունեցած միջադեպի կապակցությամբ: Հիշեցնենք, որ մի խումբ երիտասարդներ թույլ չեն տվել լրագրողներին մասնակցել Երևանի քաղաքապետ Տարոն Մարգարյանի ատենախոսության հրապարակային պաշտպանությանը, հայոհել են նրանց, խոչընդոտել մասնագիտական գործունեությունը։

Այսօր մենք փորձեցինք պարզել՝ ինչ արդյունք է տվել ոստիկանության՝ դեպքի մեղավորներին պարզելուն ուղղված աշխատանքը, սակայն դա այդպես էլ չհաջողվեց ճշտել:

Ոստիկանության հասարակայնության հետ կապերի բաժնի աշխատակից Արմեն Մալխասյանին Epress.am-ի թղթակիցը քննության մասին հարցով զանգահարել է 5 անգամ, սակայն ամեն անգամ Մալխասյանը խնդրել է ավելի ուշ զանգահարել՝ հայտնելով, որ նորություն չունի:

Հիշեցնենք, որ Տնտեսագիտական համալսարանում լրագրողների աշխատանքը խոչընդոտելու և լրագրողներին հայհոյելու փաստը ֆիքել են մի քանի ԶԼՄ-ների տեսախցիկներ:

Դեպքի օրը հրապարակվել են հոդվածներ, որոնցում նշվել է ՀՀԿ-ական երիտասարդների ինքնությունը:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել