Irates.am-ը գրում է.
Որքան էլ չեմ ուզում մեր ժողովրդի մասին վատ արտահայտվել, բայց այն, ինչ կատարվեց երեկ Երևանի կայարանամերձ հրապարակում` Էրեբունի վարչական շրջանի կողմից կազմակերպված միջոցառման ժամանակ, բառերով չես նկարագրի:
Վարչական շրջանը ոչինչ չէր խնայել հաճելի ժամանակ պարգևելու էրեբունցիներին: Բնականաբար, ամանորյա համերգն սկսվեց գեղեցիկ երգ ու պարով: Բայց երբ հերթը հասավ Ձմեռ պապի նվերներին, կարծես մի փոթորիկ անցավ հավաքվածների միջով: Մի քանի տասնյակի չափ էրեբունցիներ (մեծահասակների մասին է խոսքը), ոտքի տակ տալով փոքրիկներին, առաջ էին ձգվում` արձակելով սարսափելի ճիչ-աղաղակ: Սարսափելի էր կողքից դիտելը. այդ ճիչերին խառնվել էր նաև երեխաների լացը, որոնց մի մասը կորցրել էր ծնողներին և փորձում էր դուրս գալ այդ խցանումներից, բայց չէր կարողանում:
Ավարտվեց նվիրատվությունը։ Զարհուրած այդ տեսարանից՝ դիմեցի միջոցառման կազմակերպիչներին` հարցնելով, թե իրենց դուր եկա՞վ այդ տեսարանը, քանի որ, նշենք, գրեթե ամեն տարի այս սցենարը գրեթե նույն սկիզբն ու ավարտն է ունենում: Վերջիններս խոստովանեցին, որ իրենց համար էլ անչափ տհաճ է մարդկանց պահելաձևը. «Սա խոսում է այն մասին, որ մենք կուլտուրայից զուրկ ժողովուրդ ենք: Որքան էլ փորձում ենք այնպես անել, որ միջոցառումը գեղեցիկ ավարտ ունենա, չի լինում: Մեր ժողովուրդը երբեք չի փոխվի: Մի տոպրակի համար փչացնում են ողջ աշխատանքը»,- ասաց Էրեբունի վարչական շրջանի ղեկավարի աշխատակազմի ներկայացուցիչներից մեկը:
Ավելացնենք, որ շատ փոքրիկներ հրապարակից հեռացան առանց Ձմեռ պապի նվերի և արցունքն աչքերին: Եթե անկեղծ, այստեղ արդեն մեղքը ոչ թե միջոցառման կազմակերպիչներինն է, այլ այն բռի վարքագիծ դրսևորող քաղաքացիներինը, ովքեր մեկի փոխարեն հինգն էին թռցնում` քաշքշելով, հրելով և վիրավորելով միմյանց:
Հասմիկ ՄՈՎՍԻՍՅԱՆ
