Mardik.am-ը գրում է.
Հայտնի երաժիշտ, ազգագրագետ Անդրանիկ սարկավագ Մանուկյանը (Սասնա տղա) ինչպես հայտնի է, որոշել է քաղաքական ապաստան հայցել օտար պետությունից: Ֆեյսբուքյան որոշ օգտատերեր քննադատել են Անդրանիկ Մանուկյանի այդ քայլը՝ասելով, որ փոխանակ մնալու ու պայքարելու,ազգագրագետը որոշել է նահանջել:
Mardik.am-ի հետ զրույցում պրն Մանուկյանն ասաց, որ ինքը չի պատրաստվում իր կյանքն անիմաստ զոհել շներին կամ գելերին, գերի դառնալ սրիկաներին, երկրորդ՝ ինքը մինչ նման որոշում կայացնելը, իմաստավորված է ապրել է իր հող ու ջրի վրա: «Ես այսօր չգիտեմ՝ ում դեմ պայքարեմ: Եթե ես այսօր պետք է պայքարեմ իմ ներքին թշնամիների դեմ, ապա, ցավոք, նրանք ներկայացնում են երկիր, ուժ, պետականություն, որոնց դեմ պայքարելն անիմաստ եմ համարում»,- ասաց սարկավագը՝ հավելելով, որ, ի տարբերություն շատերի, որոնք անօրինական ճանապարհով են Հայաստանից հեռանում և օտար ափերում տարիներ շարունակ ապրում փախստականի կարգավիճակում, ինքն օրինական ճանապարհով է լքում իր հայրենիքը: «Ինչի են ինձ անպատվում, անվանում անբարոյական: Մի անառակի որդի եկել և ինձ ասում է՝ շոու ես սարքում, որ փող ստանա՞ս: Դե եթե պայքարող անհատին համարում են անբարոյական, մենք էլ քաղաքակիրթ ձևով մեր հարցերը կլուծենք»,- ասաց երաժիշտը՝ հավելելով, որ ինքը դրսում կշարունակի ստեղծագործել:
Եթե տարիներ առաջ Անդրանիկ Մանուկյանը քիչ թե շատ մեղադրում էր ՀՀ-ից հեռացողներին, հիմա ընդհանրապես չի մեղադրում: Հիմնականում մեր քաղաքացիները, ըստ ազգագրագետի, մեր պետությունից հեռանում են, որովհետև Հայաստանում օրենքները չեն գործում: «Աստված ասում է՝ եթե քեզ մի տեղ հալածում են, գնա ուրիշ տեղ, չէ որ ուրիշ տեղեր էլ կան բերրի հողեր, գնա այնտեղ արարի»,- Աստվածաշնչից մի նախադասություն է մեջբերում Սուրբ Կաթողիկե եկեղեցու հոգևոր սպասավորը:
Սարկավագի կարծիքով իր այս քայլից ոչ թե ինքը պետք է ամաչի կամ վատ զգա, այլ ՀՀ նախագահը, վարչապետը, քաղաքապետը և մյուս պաշտոնյաները:
