Նոյեմբերի 14-ին Գ. Սունդուկյանի անվան ազգային ակադեմիական թատրոնում հանդիսատեսին պարային տոն էր սպասվում: «Inter Dance» համույթը ներկայացավ իր երկրորդ մենահամերգով:
Համերգային ծրագիրը բազմաժանր էր, որտեղ տեղ էին գտել 21 համարներ, թե՛ տարբեր երկրների ազգային պարեր, թե՛ մենապարեր: Ելույթ ունեցան պարային համույթի տարբեր տարիքային խմբերի սաները, ովքեր ամեն համարից հետո արժանանում էին բարձր ծափահարությունների և «բռավոների»:
Հայկական, հրեական, վրացական, բելառուսական, հունական, մեքսիկական պարեր, «Բերդ», «Մախմուր աղջիկը», «Քո սիրտը», «Բնություն», «Այնտեղ ես չկամ», «Մի՛ լքիր ինձ», «Ջազ» ու այլ յուրօրինակ բեմադրություններ հաճույք պարգևեցին ներկաներին:
ArmStar.am-ը մենահամերգից հետո զրուցեց «Inter Dance»-ի տնօրեն Արամ Մանուկյանի հետ:
Մենահամերգն արդեն ավարտվել է: Ի՞նչ տպավորություններ ունեք, և արդյո՞ք արդարացան Ձեր սպասելիքները.
- Տպավորությունների և զգացողությունների մասին կարող եմ ասել, որ նույնն են, ինչ ամեն համերգից հետո: Միշտ էլ կա հուզմունք, տպավորություններ և նորանոր ակնկալիքներ:
Հնարավո՞ր է՝ «Inter Dance»-ը այս համերգային ծրագրով ներկայանա նաև մարզերում և արտերկրում:
- Արտերկրում արդեն ներկայացել ենք, բայց ոչ մենահամերգով, իսկ ինչ վերաբերում է մարզերին, առաժմ վաղ է խոսելը:
Ո՞րն է լինելու պարային համույթի հաջորդ քայլը:
- Չենք կարող ասել, թե որն է լինելու մեր հաջորդ քայլը, քանի որ պահն է ստեղծում իրավիճակը, բայց որ կպատրաստվենք նոր համերգների, դա միանշանակ է :
ArmStar.am-ը շնորհավորում է համույթին փայլուն համերգի կապակցությամբ և ներկայացնում միջոցառման ֆոտոհաշվետվությունը:
Շարունակությունը՝ այստեղ