Mardik.am-ը գրում է.
Համահայկական բնապահպանական ճակատի (ՀԲՃ) անդամ Լևոն Գալստյանը, mardik.am-ի հետ զրույցում խոսելով Տաշտուն համայնքում ապօրինի կառուցվող ֆաբրիկայի մասին, ասաց, որ դատախազությունն ու ոստիկանությունը քրեական գործ չեն հարուցելու, չնայած որ բնապահպանները կատարվող ապօրինության վերաբերյալ ներկայացրել են բազում փաստեր: «Իրավապահ մարմինների պարզաբանումն ուղղակի ծիծաղելի է, ինչպես կարելի է նման ակնհայտ ապօրինությունն անարձագանք թողնել և քրեական գործ չհարուցել»,-
Բնապահպանները խնդրի առնչությամբ դիմել էին նաև Բնապահպանության նախարարություն, որի վերջին երկու պատասխաններն իրար հակասում են: «Առաջին պատասխանի մեջ ասում են՝մենք կգնահատենք շինարարության հետևանքով հասցրած վնասը և հարկ եղած դեպքում կդիմենք իրավապահ մարմիններին: Հետո, երբ մենք նորից դիմեցինք նախարարություն՝ պարզելու՝ կոնկրետ ինչ քայլեր են ձեռնարկելու, 1 ամսից հետո ստացանք նման պատասխան՝ «ԱՏ-ՄԵՏԱԼՍ» ընկերությունը ներկայացրել է փորձարարական ֆաբրիկայի նախագիծը, որը հաստատված կարգով պետք է անցնի փորձաքննություն: Հետաքրքիր է՝ ինչ կապ ունի այս պատասխանը նախ` նախկին պատասխանի, և ընդհանրապես համայնքում կատարվող ապօրինի շինարարության հետ: Այսինքն՝ նախարարությունը մոռացավ հասցված վնասի ու իրավապահ մարմիններին դիմելու մասին»,- մանրամասնեց ՀԲՃ անդամը՝ հավելելով, որ թե Տաշտունի, թե Գետահովիտ համայնքների և թե մյուս բնապահպանական խնդիրների դեպքում իրավապահ մարմիններն ուղղակի անգործության են մատնված:
Ստեղծված իրավիճակից դուրս գալու ելքը զրուցակցիս խոսքով մեկն է՝ ազգաբնակչության ըմբոստությունն ու իրենց իրավունքների համար մինչև վերջ պայքարելը: «Իմ կարծիքով` մեր ղեկավարությունն իրականությունից կտրված է, նա ապրում է այլ իրականության մեջ»,- վստահ է բնապահպանը:
Մեր այն դիտարկմանը, թե համաձայն է արդյոք պարբերաբար հնչող այն կարծիքին, թե Սերժ Սարգսյանը պետք է հրաժարական տա, պրն Գալստյանի խոսքով՝ իրեն Սերժ Սարգսյանը չի հետաքրքրում, իրեն հետաքրքրում է այն խայտառակ բարձիթողի վիճակը, որն առկա է այսօր: «Սերժ Սարգսյանով մեր երկրում ոչինչ չի որոշվում, որոշվում է գործող համակարգով, որն այնքան է սուտ խոսել, որ հավատում է իր ստերին»,- եզրափակեց ՀԲՃ անդամը:
