Tert.am–ը գրում է.
Հայկական ազգանուն ունենալու պատճառով Բաքվի օդանավակայանում վատ վերաբերմունքի արժանացած 8-ամյա տղան մոր հետ վերադարձել է Մոսկվա:
Այդ մասին Instagram-ում գրառում է կատարել երեխայի մայրը՝ շնորհակալություն հայտնելով հոգատարության ու աջակցության համար:
«Մենք խաչ քաշեցինք այդ «հրաշալի» քաղաքի վրա և վերադարձանք այն բանից հետո, երբ Լուկան նորմալ պայմաններում փոքր-ինչ քնեց»,-գրել է նա՝ շնորհակալություն հայտնելով իրենց աջակցածներին:
«Լուկայից վերջում ներողություն խնդրեցին ու որպես պատվավոր հյուր ընդունեցին, սակայն իմ տղան ասաց, որ Երևանում՝ տատիկի մոտ ավելի լավ է»,-գրել է նա:
Ավելի վաղ սոցցանցերում տեղեկություն էր տարածվել, որ 8-ամյա տղային, ում մայրն ու հայրը ՌԴ քաղաքացիներ են, թույլ են տվել մուտք գործել Ադրբեջան, սակայն առանց երեխայի:
Տղայի՝ Ղուկաս Ռուբենի Վարդանյանի լուսանկարը սոցցանցում հրապարակել է երեխայի մայրը և գրել, որ երեխային թույլ չեն տալիս մտնել Ադրբեջան, թեև ծնողները ՌԴ քաղաքացիներ են: Նա նշել է նաև, որ սպասում են վերջնական որոշմանն ու անձնագրերը ստանալուն:
