«Գոյ» թատրոնի կառավարման խորհրդի նախագահ, ռեժիսոր Սարգիս Արզումանյանը հրավիրվել է ՔԿ՝ իր կողմից ներկայացված հաղորդման առնչությամբ։ Նա «Փաստինֆո»-ի հետ զրույցում ասաց, որ նախօրեին ներկայացել է ՔԿ և բացատրություն տվել։
Հիշեցնենք, որ «Գոյ» թատրոնի գործունեությունը դադարեցվել է՝ առանց թատրոնի ներկայացուցիչների համաձայնության, ԿԳՄՍ նախարարի հրամանով՝ թատրոնը միավորվել է «Սունդուկյան» թատրոնի հետ, ինչին դեմ են թատրոնի աշխատակիցները։ Ավելին, մարտի 24-ին թատրոնի դերասաններն անակնկալի էին եկել մուտքի դուռը փակ գտնելով, որի վրա եղել է ծանուցում առ այն, թե շենք կարող են մուտք գործել «Սունդուկյանի» ծառայողական մուտքով, սակայն այնտեղ էլ փաստաթղթեր են պահանջել ու արգելել ներս մտնելը։ Թատրոնի ներկայացուցիչները հայցեր են ներկայացրել՝ պահանջելով անվավեր ճանաչել «Գոյ» թատրոնի գործունեությունը պետռեգիստրով, առանց թատրոնի վարչական կազմի ստորագրության, դադարեցնելու որոշումը, մյուս հայցով պահանջում են անվավեր ճանաչել ԿԳՄՍ նախարարի՝ 701. Ն որոշումը, որով «Գոյ» թատրոնը միավորել են «Սունդուկյան» թատրոնի հետ։ Բացի այդ, մարտի 29-ին հանցագործության մասին հաղորդումներ է ներկայացվել ոստիկանություն՝ պաշտոնեական կեղծիքի, լիազորությունների և թատրոնից գողության դեպքերի առնչությամբ։
ՆԳՆ-ից «Փաստինֆո»-ի հետ զրույցում հայտնել էին, որ ներկայացված հաղորդումն ուղարկվել է ՔԿ։ Թատրոնի կառավարման խորհրդի նախագահ Սարգիս Արզումանյանը, որը ներկայացրել էր հաղորդումը, նախօրեին ներկայացել է ՔԿ և բացատրություն տվել՝ հաղորդման առնչությամբ։
«Քննիչն ընդամենը հաղորդման վերաբերյալ քննություն անցկացրեց, այսինքն՝ ինչ է իրենից ենթադրում այդ ամենը, ինչ փաստեր, հիմնավորումներ կար, այդ մասին խոսել եմ, բացատրել, այդ ամենն արձանագրվել է թղթի վրա, որը նաև ստորագրել եմ։ Բովանդակային առումով այն էր, որ ոստիկանություն հաղորդում է տրվել ապօրինության վերաբերյալ՝ ընդունման-հանձնման, որի արդյունքում պետռեգիստրում դադարեցվել է թատրոնի գործունեությունը։ Այդտեղ կա՛մ փաստաթղթի կեղծիք է եղել, կա՛մ օրենքի շրջանցում։ Երկրորդ հաղորդումը վերաբերում է գողությանը, մասնավորապես, «Գոյ» թատրոնի անձնակազմի աթոռներն են գողացել»,- ասաց Սարգիս Արզումանյանը։
Վերջինս տեղեկություն չունի՝ ինչ հատկանիշներով է նախաձեռնվել քրեական վարույթը։
Ինչ վերաբերում է դատարան ներկայացված հայցերին, ապա դրանցից մեկը, որը վերաբերում է 701. Ն որոշումն անվավեր ճանաչելուն, վարույթ է ընդունվել։ Վարչական դատարանը՝ դատավոր Լիլիթ Սադոյանի նախագահությամբ, հայցը վարույթ է ընդունել եւ Գ. Սունդուկյանի անվան ազգային ակադեմիական թատրոն ՊՈԱԿ -ը ներգրավել որպես երրորդ անձ։
Արզումանյանը նշեց, որ վաղը պատրաստվում են մուտք գործել թատրոն, քանի որ նախարարի որոշումից բխող գործողությունները կասեցվել են։
«Բնականաբար, ըստ օրենքի, մենք մեր մուտքով պետք է մտնենք։ Բացի այդ, ծանուցումներ կար մեր աշխատակիցներին, որոնց ժամկետն այսօր լրանում էր և իրենց պետք է ազատեին աշխատանքից՝ ըստ իրենց տրամաբանության, դա նույնպես, ըստ օրենքի, պետք է չլինի»,- նշեց Արզումանյանը։
