Ամառային սեզոնի բացվելու հետ միասին մեծանում է նաև բժիշկների անհանգստությունն ու վախը`կապված լողափերում բազմաթիվ վտանգավոր վարակների ու վնասակար մանրեների հետ: Սև ծովը, որը համարվում է հանգստյան առաջին վայրերից մեկը և հարյուրավոր մարդիկ նախընտրում են հենց այդ լողափում անցկացնել իրենց ամառային հանգիստը (ի դեպ, մեր հայրենակիցներից շատերը նույնպես նախընտրում են իրենց ամառային հանգիստը կազմակերպել այդտեղ), լի է առողջության համար վտանգավոր բազմաթիվ երևույթներով:
Ինչպես հայտնում է delfi.ua ուկրաինական լրատվական կայքը, Առողջապահության նախարարությանը կից տեղի գլխավոր բժիշկ Ալեքսանդր Լիտուսը զգուշացրել է սպասվելիք վարակների մասին: «Ծովափյա ավազի հետ շփման միջոցով մարդուն կարող է փոխանցվել ցանկացած հիվանդություն. դրանք կարող են լինել թե սնկային, և թե վիրուսային: Դուք պետք է հստակ հասկանաք, որ ձեզանից առաջ այս ավազի վրա կարող է եղած լինել ցանկացած բան»,-ասել է նա:
Բժշկի խոսքով,վարակի ամենամեծ աղբյուրն են փայտե լողաթախտերը: Այդ իսկ պատճառով բժիշկները խորհուրդ են տալիս որպես պաշտպանիչ միջոց օգտագործել սավաններ, և փոխել այն ամեն օր:
Մեծաքանակ միկրոբներ կան նաև լողավազաններին ամրացված ձողերի, հանդերձարանների և սանհանգույցների մոտակայքում:
Խստիվ արգելվում է բոբիկ ոտքով քայլել նշված վայրերում, իսկ եթե դա տեղի է ունեցել`հետագա բարդություններից խուսափելու համար անհապաղ ախտահանել ոտքը:
Տեղի բժիշկները նաև նախազգուշացնում են ծովի ջրի աղտոտվածության մասին: «Աղտոտվածությունը մեծ է հատկապես ջրի ընդերքում, որի մեջ կուտակվում են բազմաթիվ ծանր մետաղներ, ինչի հետևանքով էլ ախտածին երևույթները բարձրանում են մակերես: Ինքնին սա շատ վատ է, քանի որ մարդն հիմնականում մակերեսի վրա է գտնվում և նրա մարմինը անընդհատ շփման մեջ է դրանց հետ: Ցավալի է, որ դրան բացարձակապես ոչ ոք ուշադրություն չի դարձնում»,-Պետդումայում իր ելույթի ժամանակ ասել է ռուս գիտնական Ֆլինտը:
Ինչպես հաղորդում է MIGnews.com.ua-ն, ուկրաինացիները տարեցտարի հրաժարվում են ամառային հանգիստը հայրենի Սև ծովում անցկացնելուց: Պատճառը ոչ միայն վերը նշված հանգամանքներն են, այլև մատուցվող ծառայությունների բարձր գները:
