BlogNews.am-ն արդեն պատմել էր Մշակույթի կենտրոնի անցկացրած մրցույթի մասին, որում հաղթած երեք ֆիլմերը հնարավորություն են ունեցել մասնակցելու Կաննի կինոփառատոնին: «Այվազովսկի» ֆիլմը հաղթածների եռյակում էր, որի պատվիրակության շարքում էր հաղորդավարուհի, դերասանուհի Սաթենիկ Հազարյանը, ով մասնակցություն է ունենալու ֆիլմում: BlogNews.am-ի հետ զրույցում դերասանուհին պատմել է ստացած տպավորությունների մասին․
«Իմ տպավորությունները հրաշալի էին, քանի որ առաջին անգամ էի մասնակցում: Պետք է խոստովանեմ, որ իմ մանկության երազանքներից էր այդ փառատոնին մասնակցելը։ Կարծում եմ՝ յուրաքանչյուր դերասան կցանկանար լինել այնտեղ, անցնել կարմիր գորգի վրայով, տեսնել այդ կուլտուրան, այն շքեղությունը, որը կար։ Դա անբացատրելի էր»:
«Այվազովսկին» պատմական ֆիլմ է, որը մեծ հեռանկարներ ունի: Դերասանուհու խոսքով՝ պլանավորած հանդիպումները կայացել են:
Սաթենիկը նշում է, որ այդ մի քանի օրերին պարզապես վայելել է ամեն ինչ, դիտել ներկայացված բոլոր ֆիլմերը. «Այնտեղ կար մեծ էկրան, կարող էիր նայել ֆիլմերն ամեն երեկո: Ես այդ ամենը կարողացել եմ վայելել ջրի ափին։ Կինոսիրողի համար այդ ամենը տեսնելը հեքիաթային է: Լինում էին նաև հավաքույթներ, որտեղ ավելի մտերմիկ միջավայրում էին մարդիկ շփվում իրար հետ»:
Դերասանուհին կարողացել է Կաննի փառատոնի ժյուրիին տեսնել, որի շարքում Քեյթ Բլանշեթն էր, Պենելոպե Կրուզը, ում հետ, ի դեպ, անցել է կարմիր գորգով: «Այնտեղ սելֆի անել չէր թույլատրվում․ չգիտեմ՝ ինչն էր պատճառը: Բայց ամեն անգամ կարմիր գորգի մոտ կանգնած լուսանկարիչներն ասում էին, որ կանգնես, և նրանք հնարավորություն ունենան լուսանկարելու»,- եզրափակեց դերասանուհին:
Նյութը՝ Սիրանուշ Գրիգորյանի
Լուսանկարները՝ Ասատուր Եսայանցի
