Yerkir.am-ը գրում է.
Երևանի քաղաքապետարանում տեղի ունեցած միջադեպի փաստով ՀՀ քննչական կոմիտեում հարուցվել է քրեական գործ: Քրեական գործը հարուցվել է ՀՀ ՔՕ 258-րդ (խուլիգանություն) և 118-րդ (ծեծ) հոդվածների 1-ին մասերի հատկանիշներով:
Հիշեցնենք, որ միջադեպը տեղի է ունեցել փետրվարի 13-ին Երևանի ավագանու նիստի ժամանակ: «Երկիր ծիրանի» խմբակցության անդամները իրենց հետ բերել էին ապակե տարաներ` կոյուղաջրով:
«Երկիր ծիրանի»-ի անդամները բացեցին կոյուղաջրով լեցուն տարաները, իսկ խմբակցության անդամներից Մարինա Խաչատրյանը տարաներից մեկը փորձեց մոտեցնել քաղաքապետ Տարոն Մարգարյանի սեղանին, ինչի հետևանքով էլ սկսվեց ծեծկռտուքը:
Ավագանու հանրապետական անդամները սկսեցին քաշքշել «Երկիր ծիրանի»-ի կանանց՝ նրանց դահլիճից դուրս հրավիրելով: Արդյունքում` կոյուղաջրով լցված տարաներն ընկան գետնին և կոտրվեցին, և ծեծկռտուքը թեժացավ:
ՀՀԿ-ականները նիստերի դահլիճից դուրս հանեցին «Երկիր ծիրանի»-ի կանանց: Երևանի ավագանու «Երկիր Ծիրանի» խմբակցության կին անդամների նկատմամբ բռնություն գործադրելու վերաբերյալ տվյալների հրապարակումից անմիջապես հետո Մարդու իրավունքների պաշտպանը դիմել է Գլխավոր դատախազին՝ քրեական վարույթ նախաձեռնելու հարցով։
