Նյու Յորքի համալսարանի գիտնականները պարզել են, որ անկողնային սպիտակեղենում հանդիպում են մի քանի տեսակի մանրադիտակային սնկեր, որոնք կարող են մարդու համար լինել պաթոգեն (ախտածին)։ Այս մասին հայտնում է Science Alert պարբերականը։
Հետազոտողների խոսքով՝ մարդիկ անկողնում տարեկան արտադրում են միջինը 105լ քրտինք։ Շոգ օրերին խոնավ սպիտակեղենը դառնում է պատշաճ միջավայր՝ միկրօրգանիզմների աճի ու բազմացման համար։ Բմբուլե և սինթետիկ բարձերը, որոնք օգտագործվում են 1.5-20 տարի, պարունակում են 4-17 տեսակի սնկեր։
Ընդամենը 1 շաբաթում միկրոօրգանիզմների թիվը կարող է բավականաչափ մեծ դառնալ՝ ալերգիկ ռեակցիաներ առաջացնելու համար։ Ախտանշանները կարող են դրսևորվել կոկորդի ցավի, ասթմայի նման նոպաների և փռշտոցի տեսքով։
Մասնագետները խորհուրդ են տալիս շաբաթական մեկ անգամ լվանալ անկողնային սպիտակեղենը, ինչը թույլ կտա խուսափել առողջության համար բացասական հետևանքներից։
