Yerkir.am-ը գրում է.
Այսօր կառավարության նիստում ՀՀ ֆինանսների նախարար Վարդան Արամյանը ներկայացրեց ««Եվրասիական տնտեսական միության մաքսային օրենսգրքի մասին» պայմանագիրը վավերացնելու մասին» ՀՀ օրենքի նախագիծը: Նախարարի խոսքով` այն միջպետական պայմանագիր է, որի կողմերն են Եվրասիական տնտեսական միության անդամ պետությունները:
Պայմանագիրը նախատեսում է կարգավորել ԵՏՄ անդամ պետություններ երրորդ` ԵՏՄ անդամ չհանդիսացող պետություններից ապրանքների ներմուծման և նշված պետություններ ապրանքների արտահանման հետ կապված մաքսային գրեթե բոլոր իրավահարաբերությունները` բացառությամբ այն իրավահարաբերությունների, որոնք, նույն պայմանագրի համաձայն, նախատեսվում է վերապահել ԵՏՄ երկրների ազգային օրենսդրությանը:
Պայմանագրում նաև տեղայնացվել են ներկայումս գործող առանձին մաքսային իրավահարաբերություններ կարգավորող միջազգային պայմանագրերի և Եվրասիական տնտեսական հանձնաժողովի որոշումների դրույթներ` դարձնելով այն մաքսային իրավահարաբերությունները կարգավորող հիմնական և համապարփակ միջազգային պայմանագիր:
