Սիրիական ընդդիմադիրները հերթական անգամ հայտարարել են Իրանի իսլամական հեղափոխության պահապանների կորպուսի (ԻՀՊԿ) «Ղոդս» ստորաբաժանման հրամանատար Ղասեմ Սոլեյմանիի՝ Սիրիայում լրջորեն վիրավորվելու մասին: Նշվում է, որ իրանցի բարձրաստիճան զինվորականը Սիրիա էր ժամանել դեռևս ապրիլի կեսերին. օրերս սոցիալական ցանցերում լուսանկարներ են հրապարակվել սիրիական բանակի և նրան հարող ուժերի կողմից Համայում, Դարաայում իրականացվող ռազմագործողություններին Սոլեյմանիի մասնակցության վերաբերյալ:
Սիրիական կառավարական ուժերի հաջողված մի շարք ռազմագործողությունների համակարգման գործում մեծ ավանդ ունեցող իրանցի գեներալի ծանր վիրավորվելու, անգամ զոհվելու մասին պարբերաբար շրջանառվող ապատեղեկատվությունը նախկինում մի քանի անգամ հերքվել է. մեծ հավանականությամբ, այս վերջինը ևս վերոնշյալ լուրերի շարքից է:
