Արաբական մի շարք լրատվամիջոցներ, հղում կատարելով Սիրիայի Ժողովրդական ժողովի պատգամավոր, Առևտրային պալատի նախագահ Ֆարիս Շիհաբիի ֆեյսբուքյան գրառմանը, հաղորդել են, որ Հալեպի ազատագրության ռազմագործողության ընթացքում դեռևս դեկտեմբերի 15-ին քաղաքի արևելյան շրջաններից մեկում սիրիական հատուկջոկատայինների կողմից հայտնաբերվել է գաղտնի ապաստարան, որտեղ թաքնվել էին ԱՄՆ-ի գլխավորած հակաահաբեկչական կոալիցիայի ներկայացուցիչ ռազմական հրահանգիչներ: Սիրիացի պատգամավորը ներկայացրել է նաև ձերբակալված անձանց անուններն ու քաղաքացիական պատկանելությունը: Ըստ այդմ՝ ցուցակում առկա են Թուրքիայի, ԱՄՆ-ի, Քաթարի, Սաուդյան Արաբիայի, Հորդանանի, Մարոկկոյի, անգամ Իսրայելի քաղաքացիներ:
Սիրիական լրատվամիջոցներից մեկի համաձայն՝ ներկայացված 14 հոգանոց ցուցակն ամբողջական չէ. կոալիցիայի ներկայացուցիչ խորհրդատուների թիվը շատ ավելին է: Ընդհանուր առմամբ՝ նշվում է 22 ամերիկացի, 16 բրիտանացի, 21 ֆրանսիացի, 7 իսրայելցի հրահանգիչների և 62 թուրք սպաների մասին:
Հաղորդվում է նաև, որ թվարկված երկրներից որևէ մեկը դեռևս չի հաստատել տարածված տեղեկատվության իսկությունը, մինչդեռ դեկտեմբերի 16-ին այս խնդրի հետ կապված ՄԱԿ-ի ԱԽ-ի հատուկ նիստ է գումարվել:
Եթե այս տեղեկատվությունը պաշտոնապես հաստատվի, ապա դա ևս կարելի է դիտարկել որպես հերթական առարկայական ապացույց՝ Սիրիայի դեմ կազմակերպված միջազգային դավադրության:
