«The Beautified Project» ռոք խմբի երկրպագուները երեկ կրկին հավաքվել էին Տիկնիկային թատրոնում` ներկա լինելու տղաների նոր ալբոմի շնորհանդես-համերգին։ Համերգի սկզբում տղաները կատարեցին մեկական երգ իրենց առաջին, երկրորդ և երրորդ ալբոմներից, այնուհետև անցան նոր ալբոմին:
Խմբի չորրորդ ալբոմը կոչվում է «Pale Nightingale», որը թարգմանաբար նշանակում է «Գունատ սոխակ»: BlogNews-ի հետ զրույցում խմբի վոկալիստ Անդրե Սիմոնյանը հայտնեց, որ այս ալբոմի վրա աշխատել են 2 տարի։ «Ալբոմն անվանել ենք «Գունատ սոխակ», որովհետև բնության մեջ թռչունների երգը պակասել է։ Դա համեմատել ենք որակյալ երաժշտության հետ, որը ևս պակասել է։ Ալբոմում ընդգրկված է 8 ստեղծագործություն, որոնք ակուստիկ են»,- նշեց նա։
Անդրեն նկատեց, որ սա իրենց ամենահասուն ալբոմն է. «3 ալբոմ ստեղծելուց հետո ձեռք ենք բերել թիմային աշխատանքի, միասին երգեր ստեղծելու կարողություն։ Սա կարելի է համարել դասական «Beautified»–ի ձայնը։ Սա ավելի մոտ է մեր առաջին և երկրորդ ալբոմներին, որոնք ավելի ակուստիկ էին և ավելի էին սիրվել Հայաստանում, քան երրորդը, որ ներառում էր ծանր գործեր և ավելի շատ սիրվել էր դրսում»։
Անդրեն հայտնեց, որ երրորդ ալբոմի վրա ավելի շատ աշխատել էին ինքն ու Արմեն Շահվերդյանը, այս անգամ՝ ինքն ու Առլեն Շահվերդյանը։ Այս փաստը պայմանավորված է նրանց երաժշտական նախասիրություններով։
«3-րդ ալբոմում ավելի շատ էին կոնֆլիկտները, քանի որ ես ուզում էի ստեղծագործություններն էլ ավելի ծանր ռոքային լինեին։ Մեր կենդանի կատարումների ժամանակ ծանր գործերը գերակշռում են։ Ի վերջո հասկացա, որ սխալ է անընդհատ քո գաղափարն առաջ տանելը։ Պետք է ասել, լսել և, ի վերջո, սինթեզել այ ամենը։ Սա թիմային աշխատանք է»,- ասաց ծանր գործիքավորման սիրահար Արմենն ու հավելեց, որ ակուստիկ գործեր ասելով՝ նկատի չունեն, որ չորրորդ ալբոմում լացելու գործեր են։
Առլենն էլ անդրադարձավ հայկական երգերին, որոնց իրենք պարբերաբար անդրադառնում են. ««Կիլիկիայից» սկսած՝ հայկական հին երգերը մշակում ենք մեր ձեռագրով, արդիականացնում ենք և ներկայացնում մեր լսարանին։ Այս ալբոմում ներառել ենք «Արագիլը», որը ձայնագրել ենք նախորդ տարի։ Առաջիկայում կներկայացնենք նոր ստեղծագործություն՝ Սայաթ-Նովայի «2 տուն ունիմը», որի մասին առաջիկայում նոր լուրեր կունենաք։)»։
Խումբը նաև նոր տեսահոլովակ է նկարահանել՝ նվիրված աշխարհում համերաշխությանը։ Տեսահոլովակը նկարահանել են 12 երկրում։
Նյութը՝ Ամալյա Հովհաննիսյանի
Լուսանկարները՝ Կարեն Հովհաննիսյանի
