Այսօր կպատրաստեմ Հայաստանում ամենատարածված աղցաններից մեկը՝ Թաբուլե։ Այն մեծ սեր և տարածում գտավ Հայաստանում 1946-48 թվականների հայերի ներգաղթից հետո, որը խորհրդահայ պատմագրության մեջ ստացավ «Մեծ հայրենադարձություն» անունը: Հայրենադարձների մեջ էին նաև սիրիահայերը, որոնք իրենց հետ բերեցին այս աղցանի բաղադրատոմսը։ Հիմա արդեն հայկական խոհանոցը դժվար է պատկերացնել առանց թաբուլեի, քաղաքում գրեթե չկա մի ռեստորան կամ սրճարան, որը չունի իր ճաշացանկում այս աղցանը։
Մայրիկիս ծնողները Սիրիայից եկած հայրենադարձներ էին և ես ջերմ հուշեր ունեմ մանկության տարիներից, երբ հանգստյան օրերին բոլորս հավաքվում էինք տատիկիս տանը՝ թաբուլե ուտելու։ Կիտրոն, թարմ կանաչեղեն, տոմատ, անանու՜խ, դժվար է դիմակայել և չուտել միանգամից մի քանի բաժին, հատկապես որ այն չի ծանրացնում ստամոքսը, այլ հակառակը՝ մաղադանոսի մեծ քանակի շնորհիվ, նույնիսկ արագացնում ու հեշտացնում է մարսողությունը:
6-8 բաժին թաբուլե պատրաստելու համար, մեզ անհրաժեշտ են հետևյալ բաղադրիչները՝
Բլղուր - 0,5կգ - 350դր
Մաղադանոս - 3 փունջ - 300դր
Կանաչ սոխ - 3 փունջ - 300դր
Անանուխ - 0,5 փունջ - 50դր
Տոմատի մածուկ 250գր - 250դր
Ձեթ 0,5 բաժակ /ըստ անհրաժեշտության ավելացնել/
Կիտրոն 1 հատ - 250դր
Աղ/կարմիր պղպեղ
Ընդհանուր՝ 1500 դր
Պատրաստման տևողությունը՝ 20 րոպե։
Բլղուրը լցնում ենք մեծ թասի մեջ, աղ և պղպեղ ավելացնում, վրան լցնում եռացրած ջուր, այնքան որ ամբողջը ծածկվի, ոչ ավել, որպեսզի աղցանը թաց չստացվի, ծածկում ենք թասը խոհանոցային սրբիչով և դնում մի կողմ։ Մինչ բլղուրը փափկում է՝ մաղադանոսը, սոխը և անանուխը շատ մանր կտրատում ենք: Երբ բլղուրը փափկում է, ավելացնում ենք տոմատի մածուկը, կտրատված կանաչին, ձեթը, կիտրոնի հյութը, համեմունքները և լավ խառնում ենք: Տոմատի մածուկի փոխարեն կարելի է շատ մանր կտրատած լոլիկ լցնել։ Մատուցվում է աղցանը հազարի հետ, կամ հազարի վրա։ Հաճախ թաբուլեն ուտում են առանց պատառաքաղի կամ գդալի, հազարի թերթիկների և մատերի օգնությամբ։
