Tert.am–ը գրում է.
Թուրքիայի նախագահ Ռեջեփ Թայիփ Էրդողանը հայտարարել է, որ երկրի խորհրդարանը կարգելափակի Եվրամիության հետ կնքած համաձայնագիրը Եվրոպայում միգրացիոն ճգնաժամի կարգավորման վերաբերյալ, եթե առաջընթաց չգրանցվի թուրք քաղաքացիների համար ԵՄ-ի հետ ազատ վիզային ռեժիմ սահմանելու հարցում:
«Եթե դա տեղի չունենա, Թուրքիայի խորհրդարանը ոչ մի որոշում և օրենք չի ընդունի անօրինական ներգաղթյալների հետընդունման համաձայնագրի շրջանակներում», - BBC-ի փոխանցմամբ` հայտարարել է Էրդողանը Համաշխարհային մարդասիրական գագաթնաժողովի փակմանը Ստամբուլում:
Նա նաև ընդգծել է, որ միջոցները, որոնք ԵՄ-ն խոստացել էր փոխանցել Անկարային փախստականներին ճամբարներում վերաբնակեցնելու համար, դեռևս չեն ստացվել:
Մարտին ԵՄ-ի և Թուրքիայի ղեկավարությունները համաձայնեցրել էին միգրացիոն ճգնաժամի կարգավորման սկզբունքները: Գործարքի շրջանակներում մարտի 20-ից անօրինական ներգաղթյալները, որոնք Հունաստան էին ժամանում, պետք է հետ վերադառնային Թուրքիա:
Անկարան համաձայնել էր ընդունել փախստականներին` ֆինանսական օգնություն ստանալու և ԵՄ-ի հետ վիզային ռեժիմի ազատականացման դիմաց:
