Tert.am-ը գրում է.
Զուգահեռներ տանելով մերօրյա և 90-ականների Ադրբեջանի ռազմական գործողությունների միջև կարող ենք հստակ ասել, որ վերջինս ցանկանում է համարյա նույնությամբ կրկնել իր ռազմատենչ գործողությունները:
Այս մասին լրագրողների հետ զրույցում հայտարարեց «Սովորական ցեղասպանություն» նախագծի ղեկավար Մարինա Գրիգորյանը:
«Վաղն՝ ապրիլի 30-ին, լրանում է Ադրբեջանի իշխանությունների և խորհրդային ղեկավարության գորբաչովյան թևի կողմից Արցախը հայաթափելու «Օղակ» ռազմական գործողության 25-րդ տարելիցը: Այս տարվա ապրիլյան քառօրյա պատերազմն իրականացնելով՝ Ադրբեջանն ամենայն հավանականությամբ ցանկացավ մեզ հիշեցնել ապրիլ ամսվա խորհուրդը, այն է՝ ցավ, մարդկային կորուստներ, պատերազմ: 25 տարի է անցել, սակայն նույն ձեռագրով ադրբեջանցիները մտնում են ղարաբաղյան գյուղեր՝ մարդկանց ահաբեկում և սպանում են »,- ասաց Գրիգորյանը:
Վերջինս իր խոսքերը հիմնավորելու համար ներկայացրեց ևս մեկ փաստ. «Դեռևս թարմ են մեր հիշողությունները, որ այս տարվա ապրիլի 10-ին դպրոցի ճանապարհին սպանվեց 12-ամյա Վաղինակ Գրիգորյանը, իսկ 1991 թվականին՝ կրկին ապրիլին, Գետաշենում սպանվեց 12-ամյա Արամայիս Սահակյանի»:
Բանախոսը նշեց, որ պատմական զուգահեռներն այնքան ակնհայտ են, որ թվում է, թե ինչ-որ «ռիտուալ բան կա այստեղ, ինչը, հնարավոր է, մեր համար հիշեցում է»: Այդուհանդերձ, Մարինա Գրիգորյանը հայտնեց, որ ժամանակները փոխվել են, Հայաստանն այլև անկախ պետություն է և պետք է այս դեպքերի վերաբերյալ դիմի ՄԱԿ-ին և այլ միջազգային կառույցների:
