Սիրիայի վերաբերյալ բանակցություններն անիմաստ են, քանի դեռ Ռուսաստանն ավիահարվածներ է հասցնում. Էրդողան

Tert.am-ը գրում է.

Թուրքիայի նախագահ Ռեջեփ Թայիփ Էրդողանը հայտարարել է, որ Սիրիայում իրավիճակի վերաբերյալ խաղաղ բանակցություններն իմաստ չունեն, քանի դեռ Ռուսաստանը շարունակում է ավիահարվածներ հասցնել այդ երկրի տարածքում, հաղորդում է BBC-ի ռուսական ծառայությունը։

 

«Ռուսաստանը շարունակում է մարդկանց սպանել Սիրիայում: Կարելի՞ է խոսել խաղաղ հավաքի մասին: Կարո՞ղ է խոսք գնալ խաղաղ բանակցությունների մասին»,- ասել է Էրդողանը։

 

Նախօրեին սիրիական ճգնաժամի հարցով ՄԱԿ-ի հատուկ բանագնաց Ստեֆան դե Միստուրան մինչև փետրվարի 25-ն ընդմիջում է հայտարարել Սիրիայի վերաբերյալ բանակցություններում՝ առաջարկելով մասնակիցներին «դեռ աշխատել»։

 

Սակայն Էրդողանի խոսքով՝ բանակցությունների մասնակիցներին դժվար թե հաջողվի որոշման հասնել փետրվարի վերջին, և բանակցությունները հավանաբար նորից կհետաձգվեն։

 

Սիրիայի ընդդիմության պատվիրակությունն արդեն հեռացել է Ժնևից։ Պաշտոնական Դամասկոսն ընդդիմությանը մեղադրում է բանակցությունները տապալելու փորձի համար։ Ընդդիմությունն ու նրա աջակից պետություններն էլ փոխադարձաբար մեղադրում են Դամասկոսին և նրա դաշնակիցներին։