Յուանի արժեզրկման պատճառները

Չինաստանի ԿԲ-ն ևս մեկ անգամ դևալվացիայի ենթարկեց յուանը՝ 1 դոլարի փոխարժեքը սահմանելով 6,45 յուան: Նման հաճախակի գործընթացներն ունեն իրենց արդարացումը:

Ամերիկյան դոլարի արժևորմանը զուգահեռ բարձրանում է նաև յուանի արժեքը: Չինական արժույթի արժևորումն այս իրավիճակում առաջին հերթին ձեռնտու չէ հենց այդ երկրին: Գերարժևորման արդյունքում չինական արտահանվող ապրանքները գնային առումով իրենց մրցունակությունը կորցնում են` դրանով իսկ կորցնելով բազմաթիվ շուկաներ:

Այս քայլերի շնորհիվ Չինաստանը փորձում է վերացնել արտահանման ներուժի թուլացման վտանգը: Այս պահի դրությամբ երկրի տնտեսական աճի տեմպերը դանդաղել են, կրճատվել են արտաքին առևտրի տեմպերը: Մասնավորապես՝ հունվար-հոկտեմբերին Չինաստանում արտաքին առևտրի ծավալները կրճատվել են 8,5%-ով, որտեղ արտահանումը նվազել է 2,5%-ով, իսկ ներմուծումը 15,7%-ով:

Եթե հաշվի առնենք Չինաստանի դերը համաշխարհային տնտեսությունում, ապա նման բացասական իրավիճակն ազդում է բազմաթիվ երկրների վրա, այդ թվում և Հայաստանի:

Չինաստանի կողմից ձեռնարկվող քայլերի շնորհիվ բազմաթիվ այլ երկրներ կկարողանան խթանել իրենց արտահանման ներուժը: