Ռեյչելը նախքան անորեքսիայով հիվանադանալը
Անորեքսիան մի խանգարում է, որը բնորոշվում է չափազանց ցածր քաշով և գիրանալու անհիմն վախով։ Անորեքսիայով տառապող մարդիկ սովորաբար աղճատված պատկերացում ունեն սեփական մարմնի մասին։ Նրանք հաճախ դիտավորյալ սահմանափակում են իրենց սնունդը կամ վերահսկում ընդունած կալորիաների քանակը կերածը փսխելու միջոցով։ Նրանք կարող են նաև նիհարելու նպատակով դիմել չափազանց ինտենսիվ մարզումների։
Հարավային Կարոլինայի բնակչուհի Ռեյչել Ֆարոքը մեկն է անորեքսիայի զոհերից։ Նա մոտ 18-20 կգ է կշռում։ Ռեյչելն իր ստույգ քաշը չի հրապարակում, սակայն մի թռուցիկ հայացքն էլ բավական է լեղաճաք լինելու համար։
Ամեն ինչ սկսվեց հենց այս մարզասրահից, որտեղ Ռոնն աշխատում էր որպես Ռեյչելի անձնական մարզիչ։
37-ամյա Ռեյչելը տառապում է նյարդային անորեքսիայով՝ անորեքսիայի ամենասուր տեսակներից մեկը։ Նա մահամերձ է, և հիվանդանոցները հրաժարվում են ընդունել նրան։ Կա միայն մեկ հիվանդանոց, որում նա կարող է բուժում ստանալ։
Արդեն տասը տարի է, ինչ Ռեյչելը պայքարում է այս սարսափելի հիվանդության դեմ։ Վերջին ամիսներին կնոջ վիճակը կտրուկ սրվել է, ինչի արդյունքում նա հյուծվել է, նրա մոտ առաջացել է շնչարգելություն, ու նա չի կարողանում անգամ ինքնուրույն ոտքի կանգնել։
Ռեյչելը զվարճանում է ամուսնու հետ նախքան անորեքսիայով հիվանդանալը։
Նրա ամուսին Ռոն Էդմոնդսոնը, ով նախկինում նրա անձնական մարզիչն էր, ստիպված էր աշխատանքից դուրս գալ՝ անօգնական կնոջը խնամելու համար։ Երբ նրանք նոր էին ծանոթացել, Ռեյչելն աշխույժ ու գեղեցիկ կին էր, իսկ հիմա նա մահվան դուռն է հասել, սակայն նա չի կորցնում իր հույսը և շարունակում է պայքարել։
Երբեմնի երջանիկ ամուսնական զույգի համար այս ժամանակները լոկ անցյալի քաղցր հուշեր են։
Թեպետ ապաքինման շանսերը շատ ցածր են, բուժման համար հսկայական գումար է հարկավոր։ Այդ գումարը հավաքելու նպատակով Ռեյչելը տեսանյութ է նկարահանել, որում խնդրում է մարդկանց ֆինանսապես օգնել իրեն։ Մինչ օրս հավաքվել է 44,225 դոլար, իսկ տեսանյութը դիտվել է ավելի քան 37,860 անգամ։ Ռեյչելն էջ է բացել «GoFundMe»-ում, որտեղ նրան օգնել ցանկացողները կարող են դրամական փոխանցումներ կատարել։ Այնտեղ նշված է, որ Ռեյչելը ցանկանում է 100,000 դոլար հավաքել։
Այս հուզիչ տեսանյութում Ռեյչելն ասում է.
Ես այնպիսի մարդ չեմ, ով երբևէ օգնություն կխնդրեր... Ես ունեմ Ձեր օգնության կարիքը, հակառակ դեպքում ես փրկվելու շանս չունեմ։ Ես պատրաստ եմ ապաքինման գործընթացին։
Ռոնն օրնիբուն զաղված է կնոջ խնամքով։
Ամեն ինչ սկսվեց այն ժամանակ, երբ Ռեյչելը որոշեց մարզասրահ հաճախել մի քանի կիլոգրամ նիհարելու համար։ Այդ ժամանակ նա 57 կգ էր կշռում, սակայն տարիների ընթացքում նիհարելու ցանկությունը վերածվեց մոլուցքի, ու Ռեյչելի քաշը հասավ մոտ 20 կիլոգրամի։ Տեսանյութում պարզորոշ երևում է, որ Ռեյչելի կրծքավանդակի ոսկորները դուրս են ցցված, դեմքը գունատ է ու այնքան հյուծված, որ երակներն ընդգծվում են մաշկի տակից, իսկ ոտքերն այնքան բարակ են ու ոսկրոտ, որ թվում է, թե Ռեյչելն ուր-որ է կընկնի ու շունչը կփչի։
Վերհիշելով հին ու բարի օրերը՝ Ռեյչելն ասել է.
«Իմ քույրն ինձ տվեց հին լուսանկարներիս կոլաժը։ Ես նայում եմ այնտեղ պատկերված աղջկան։ Դա ընդամենը մի քանի տարի առաջ էր։ Գիտեմ, որ ես վատնել եմ կյանքիս այսքան ժամանակը։ Ես պարզապես ուզում եմ նորից այն անձնավորությունը լինել՝ այն ուժեղ, անկախ կինը, ով կարող է լինել այնպիսին, ինչպիսին կա»։
Անորեքսիայի հետևանքով որոշ ժամանակ առաջ Ռեյչելի մոտ սրտի ու լյարդի հետ կապված խնդիրներ ի հայտ եկան։ Հարկ եղավ մի քանի անգամ արյան փոխներարկում կատարել։ Նորմայից զգալիորեն ցածր քաշի պատճառով Ռեյչելի մտավոր կարողությունները ևս տուժել են։
Ռեյչելը 2014 թ.-ին
Տեսանյութի մեջ նա նշում է.
Այսքան ցածր քաշ ունենալու հետևանքով իմ ուղեղը դանդաղ է աշխատում։ Ես երբեմն մոռանում եմ ընդամենը մի քանի վայրկյան առաջ ասածս։ Այստեղ պարզապես դու ինքդ չես որոշում խաղի կանոնները։
Ռեյչելի ամուսին Ռոնը նշել է, որ հիվանդանոցները խուսափում են իր կնոջն ընդունելուց, քանի որ չեն ուզում պատասխանատվություն վերցնել իրենց վրա։ Այնինչ, եթե անհապաղ քայլեր չձեռնարկվեն, իր կինը կմահանա։ Հուսանք, որ համապատասխան գումարը ժամանակին կհավաքվի, և բուժումը կտա ցանկալի արդյունքը։