Tert.am-ը գրում է.
Կառավարության որոշման նախագծով, որը ներառված է իր առաջիկա նիստի օրակարգում, առաջարկվում է խստացնել դպրոցներում ու նախակրթական հաստատություններում սանիտարահիգիենիկ նորմերի նկատմամբ վերահսկողությունը, ինչի նպատակով որոշման նախագծով վերացնում է իր իսկ որոշմամբ նախկինում սահմանված արգելքը:
Նպատակն է պարզել` ՀՀ սանիտարական օրենսդրությամբ սահմանված պահանջների կատարումը, արձանագրված թերությունները և խախտումները վերացումը, ինչպես նաև ոլորտի անվտանգության ապահովումը և հնարավոր ռիսկերի կանխարգելումը:
Որպես ենթաիրավական ակտի ընդունման անհրաժեշտություն` հիշեցվում են 2014 թվականին տեղի ունեցած մի շարք դեպքեր, մասնավորապես՝ Եղվարդի մանկապարտեզում երեխաների շրջանում արձանագրված զանգվածային թունավորումները` պայմանավորված ՀՀ սանիտարական օրենսդրությամբ սահմանված սանիտարական կանոնների և հիգիենիկ նորմատիվների պահանջների անհամապատասխանությամբ:
«Նշված ոլորտում վերջին տարիներին շարունակական վերահսկողության բացակայության հետևանքով ի հայտ են եկել և ներկայումս առկա են լուրջ խնդիրներ»,- նշված է նախագծին կցված հիմնավորումների բաժնում:
Նախագծի ընդունումը գործադիրի գնահատմամբ` կնպաստի ՀՀ ԱՆ աշխատակազմի առողջապահական տեսչությանն իրականացնել օրենքով սահմանված ստուգումեր:
Համաձայն տեսչական բարեփոխումների հայեցակարգի` բոլոր ստուգում իրականացնող մարմինները պետք է անցում կատարեն ռիսկի վրա հիմնված համակարգի՝ իրենց ռեսուրսներն ուղղելով առավել ռիսկային օբյեկտների ստուգմանը: Միևնույն ժամանակ ստուգումները պետք է իրականացվեն նախօրոք հաստատված ստուգաթերթերի հիման վրա:
