Tert.am-ը գրում է.
ՀՀ աշխատանքի և սոցիալական հարցերի նախարար Արտեմ Ասատրյանը Tert.am- ի հետ զրույցում ասաց, որ մտահոգ է էլետրաէներգիայի հնարավոր թանկացմամբ, մանավանդ, որ մեր բյուջեի 29 տոկոսը նախատեսված է սոցիալական պաշտպանության ծախսերի համար:
«Այդ հարցը մտահոգում է ոչ միայն ինձ ու Կառավարությանը. կարող եմ ասել, որ մեր բնակչության սոցիալական խնդիրները մեր ուշադրության կենտրոնում են: Եվ բնական է, որ սակագների ցանկացած փոփոխություն կամ գնաճ մեզ խիստ մտահոգում է, որովհետև առաջին հերթին՝ ազդեցություն է ունենում մեր քաղաքացիների կենսապայմանների վրա»,-ասաց Արտեմ Ասատրյանը:
Ի պատասխան հարցի, թե ինչ է զգում, երբ օրինակ՝ 14 տոկոսով թոշակ է բարձրացվում, իսկ էլետրաէներգիայի սակագինը վերանայման դեպքում վերջին երկու տարում կրկնակի կթանկանա ու կարծես ջուրը կգցի ամենը, ինչ արվել է սոցիալական ոլորտում, Արտեմ Ասատրյանն ասաց. «Ամեն դեպքում՝ հոսանքի սակագնի ավելացում դեռ չկա, չնայած կա հայտ, որը պետք է քննվի Հանրային ծառայությունները կարգավորող հանձնաժողովի կողմից:
Եվ որոշում կայացվելու դեպքում, բնական է, որ Կառավարությունը պիտի կարողանա կանոնակարգել մեր քաղաքացիների եկամուտների հետ կապված խնդիրները»:
Նախարարը հիշեցրեց, որ անցած տարի՝ օգոստոսին, երբ կրկին սակագնի վերանայում տեղի ունեցավ, Կառավարությունը սոցիալապես անապահով հարյուրհինգ հազար քաղաքացիների համար ավելացրեց բազային նպաստի չափը:
Այսինքն՝ նման որոշում լինելու դեպքում Արտեմ Ասատրյանը բնական է համարում, որ Կառավարությունը պետք է արձագանքի այդ որոշմանը:
Հիշեցնենք, որ որ ծանուցվեց, որ ՀԷՑ-երը պատրասվում են մոտ 15 տոկոսով բարձրացնել էլեկտրաէներգիայի սակագինը՝ այն դարձնելով 58 դրամ ՝ մեկ կիլովատի դիմաց, թեպետ ՀԾԿՀ-ն դեռ չի շտապում հիմնավոր համարել էլեկտրաէներգիայի սակագինը բարձրացնելու հայտը: Հաշվի առնելով, որ մոտ երկու տարի առաջ նույն սակագինը 30 դրամ էր, հերթական անգամ վերանայելու դեպքում կստացվի հոսանքի սակագնի շուրջ 100 տոկոսանոց բարձրացում:
Հիշեցնենք, որ էներգետիկայի նախարար Երվանդ Զախարյանը հայտարարել էր, թե թանկացումը «ամբողջությամբ հիմնավորված» է:
