Ղպտիական եկեղեցու պատրիարք Թեոդորոս Երկրորդ Ալեքսանդրացին հայտարարել է, որ Ապրիլի 24-ին մասնակցելու է Հայոց ցեղասպանության հարյուրամյակի ոգեկոչմանը Երևանում: Այս մասին հայտնում է theorthodoxchurch.info-ն:
Աղբյուրը նկատում է, որ ղպտիների` Եգիպտոսի քրիստոնյաների առաջնորդը այս հայտարարությունն արել է Եգիպտոս-Թուրքիա լարված հարաբերությունների ֆոնին:
Միևնույն ժամանակ աղբյուրը գրում է, որ այս այցի մասին շատ չի բարձրաձայնվում և այս պահին անհայտ է` արդյո՞ք Թեոդորոս պատրիարքը կատարվածը ևս ցեղասպանություն կկոչի, ինչպես Հռոմի պապը, քանի որ Եգիպտոսը երբեք 1915-ի առնչությամբ պաշտոնապես չի կիրառել «ցեղասպանություն» եզրույթը:
Աղբյուրը նկատում է նաև, որ չնայած հայկական և ղպտիական եկեղեցիները տարբեր են, դրանք, այնուամենայնիվ, նույն օրացույցն ու ավանդույթներն ունեն:
Ղպտիները կազմում են Եգիպտոսի բնակչության մոտ 15%-ը` 10 - 13 մլն մարդ:
