Այս զարմանալի լուսանկարներում պատկերված է սառցե քարանձավների հիասքանչ գունապնակը։ Այս ծիածանային քարանձավները խայտաբղետ գույներ են ստանում սառույցի մեջ արտացոլվող լույսի շնորհիվ։ Որքան ավելի հաստ է սառույցը, այնքան ավելի զմրուխտյա տեսք են դրանք ունենում։ Լուսանկարիչ Դենիս Բուդկովը որոշեց էլ ավելի գունազարդել այս սքանչելի պատկերը։ Նա բերանով կրակ փչեց սառցե քարանձավներում, ու բոցերի ֆոնին սառույցի կապույտ երանգը վերածվեց բոսորի։
Այս քարանձավները գտնվում են Մուտնովսկի հրաբխի մոտակայքում՝ Կամչատկայի Պետրապավլովսկից 72 կմ դեպի հարավ։ 35-ամյա լուսանկարիչ Դենիս Բուդկովը զբաղվում է նաև զբոսավարությամբ։ Այս քարանձավները նաև զբոսաշրջային հետաքրքրություն են ներկայացնում իրենցից։ Այնուամենայնիվ, քչերն են համարձակվում ոտք դնել այս վտանգավոր քարանձավներից ներս։ Բուդկովն այդ սակավաթիվ համարձակներից է։ Անտեսելով այն հանգամանքը, որ քարանձավներն ամեն րոպե կարող են փուլ գալ, նա մուտք գործեց այդ գունագեղ աշխարհը լուսանկարելու համար։
Դենիսն ինքն էլ պատկերված է այս լուսանկարում կրակի բոցեր արձակելիս։ Լուսանկարչական նախագծից հետո անցկացված հարցազրույցի ըթացքում Դենիսն ասել է.
Ներսում շատ ցուրտ ու խոնավ էր, ջուրն էլ վար էր հոսում կտուրից ու պատերից։ Ներսում զրո աստիճան էր, ու ոսպնյակները խոնավանում էին՝ դժվարացնելով լուսանկարելու գործընթացը։ Բայց երբ ես քարանձավների խորքն անցա, ես ապշեցի տեսածս գույներից։ Ես նախկինում երբեք նման բան չեմ տեսել։ Սառույցի բյուրեղյա գույները շատ տպավորիչ էին, ու ռիսկն արդարացված էր։
Ձախ կողմի լուսանկարում ներայացված է քարանձավների տեղը, իսկ աջ կողմում՝ Դենիս Բուդկովի լուսանկարը։
Դենիսը պատահմամբ հայտնաբերեց այս քարանձավները, որոնք մասամբ լցված են ջրով։ Սառցե քարանձավների յուրօրինակ կառույցները ստեղծվում են ձմռանը, երբ ձյունը կուտակվում է ու վերածվում սառույցի։ Իսկ երբ վրա են հասնում ամռան ամիսները, սառույցի ինտենսիվ հալման արդյունքում առաջանում են ձորակներ, որոնցից ջուր է հոսում՝ քայքայելով քարանձավների սառցե շերտը։ Լույսի սքանչելի ցոլքերը, որոնք փայլփլում են մանուշակագույն, կապույտ, կանաչ ու դեղին գույներով, լուսանկարների խմբագրման համակարգչային ծրագրերի միջոցով չեն ստացվել։ Այստեղ ամեն ինչ բնական է, ու համակարգչային ծրագրերի փոխարեն գործում է պայծառ արեգակը, որի շողերի տակ էլ ստացվում է այս զարմանահրաշ գունապնակը։
Հարցազրույցի ընթացքում լուսանկարիչ Դենիս Բուդկովը նշել է.
Ես մի քանի օր անցկացրի քարանձավների մոտակայքում, սակայն միայն մեր ուղևորության վերջում համարձակվեցի ներս մտնել։ Ես վախենում էի, որ տանիքը փուլ կգար գլխիս։ Քանի որ բլուրը գտնվում է ակտիվ հրաբխի մոտակայքում, տեղանքը շատ վտանգավոր է։ Այնուամենայնիվ, ես չափազանց հետաքրքրասեր էի, որպեսզի կորցնեի գույնզգույն քարանձավները լուսանկարելու հնարավորությունը։