Tert.am-ը գրում է.
Տնտեսագիտության թեկնածու Վիլեն Խաչատրյանը դոլարի՝ վերջին մի քանի օրերին մոտ 5-6 դրամով արժեզրկումը պայմանավորում է մի քանի գործոնների փաթեթով, որոնցից առաջինը Նովրուզի օրերին Հայաստան մեծ քանակությամբ իրանցի զբոսաշրջիկներն են և նրանց՝ մեր երկիր բերած դոլարները:
Tert.am-ի հետ զրույցում այս մասին ասաց տնտեսագիտության թեկնածու Վիլեն Խաչատրյանը և նկատեց, որ երկրորդ գործոնը ռուսական ռուբլու կայունացումն է:
«Մեկ դոլարն արդեն հասել է 58 ռուբլու, եթե սա դրամով ենք արտահայտում, ապա ռուբլին դրամով թանկացել է: Երրորդ գործոնը տնտեսության մեջ գնողունակության անկումն է և ներմուծման ծավալների որոշակի կրճատումը (մոտ 28 տոկոսի չափով), իսկ սա նշանակում է, որ դոլարի պահանջ քիչ է եղել: Այսինքն՝ դոլար գնող քիչ է եղել»,-նկատեց տնտեսագետը:
Որպես դոլարի փոխարժեքի անկման չորրորդ գործոն՝ Վիլեն Խաչատրյանը դիտարկում է եվրոյի գործոնը:
«Այսինքն, որ մարդիկ իրենց եվրոներից ազատվել են, անցել են դոլարի, և չնայած դա ենթադրում է, որ դոլարը պետք է թանկանար (առաջարկ պահանջարկի օրենքով), բայց իրականում հակառակն է տեղի ունեցել, որովհետև եվրոյի ու դոլարի տեսակարար կշիռների տարբերություն կա: Այսինքն՝ դոլարի վերածված եվրոն ավելի քիչ է եղել, քան իրանցիների բերած դոլարները: Եվ, առհասարակ, մյուս՝ վերը թվարկված գործոնների ազդեցությունը ավելի մեծ է եղել»,-ասաց տնտեսագետը:
Նրա գնահատմամբ` այստեղ դեր է խաղացել ևս մեկ գործոն՝ եվրապարտատոմսերի տեղաբաշխումը ՀՀ տնտեսության մեջ, այսինքն՝ մոտ 800 միլիոնի չափով դոլարի մուտքը:
Ամեն դեպքում Վիլեն Խաչատրյանը կարծում է, որ սա կարճաժամկետ արժեզրկում է, քանի որ ԱՄՆ Դաշնային պահուստային համակարգը, ինչպես հայտարարվել է, տարվա կեսից բարձրացնելու է դոլարի վերաֆինանսավորման տոկոսադրույքը, ինչը նշանակում է փոխարժեքի բարձրացում:
Ի պատասխան դիտարկման, թե Հայոց ցեղասպանության 100-ամյա տարելիցի ամենաթեժ շրջանում` ապրիլին Հայաստան զբոսաշրջիկների մեծ հոսք է լինելու, ինչը նշանակում է, որ Հայաստան է մտնելու մեծ քանակությամբ արտարժույթ. ի՞նչ տատանումներ են ակնկալվում, տնտեսագետ նկատեց. «Գուցե այդ ժամանակ էլ նկատվի որոշակի փոփոխություն, բայց ես չեմ կարծում, որ կուրսի տատանումը շատ կփոխվի, միևնույն է` գտնվելու է 460-480 միջակայքում»,-կանխատեսեց Վիլեն Խաչատրյանը:
