Եթե կարծում էիք, թե վերջերս ինտերնետում բում առաջացրած զգեստը տեսողական խաբկանքների գագաթնակետն էր, ապա չարաչար սխալվում եք։ «Twitter»-ում հայտնված այս լուսանկարները տվել-անցել են հակասական զգեստին։ Այս երկու լուսանկարներում պատկերված են բերանին մոտ պահված ներկված եղունգներ։ Թվում է, թե դրանք բոլորովին տարբեր գույների են. մեկը՝ վարդագույն, մյուսը՝ բալագույն։
Այս լուսանկարները միանման են, սակայն այնպիսի տպավորություն է, որ դրանք շատ են տարբերվում։ Պատճառն այն ֆոնն է, որի վրա պատկերները տեղադրվել են «Photoshop»-ի օգնությամբ։ Ձախ կողմի լուսանկարը սպիտակ ֆոնի վրա է, իսկ աջ կողմինը՝ սև։ Սա այս լուսանկարների միակ տարբերությունն է։
Լուսանկարի բնօրինակում, որը պատկերված է վերևում, շրթունքներն ու եղունգները պիքսելացված են, և փոքրիկ խորանարդներից մի քանիսը մանուշակագույնի երանգ են կազմում, մինչդեռ մյուսները վարդագույն են թվում։ Այս պիքսելների պատճառով լուսանկարը կիսով չափ թափանցիկ է դառնում, ուստի կարող է տարբեր գույներ ստանալ՝ կախված նրանից, թե ինչ ֆոնի վրա կդրվի «Photoshop»-ի օգնությամբ։ Հենց սա է պատճառը, որ սպիտակ ֆոնին երևում են վարդագույն շրթունքներ ու եղունգներ, իսկ սևին՝ բալագույն։