Այնքան խորհրդավոր և զարմանահրաշ է Հիսուսի հրաշափառ Ս. ԾՆՆԴՅԱՆ խորհուրդը, որի մասին մտածելիս ակամայից սիրտդ ու հոգիդ լցվում են հույսով, սիրով և հավատով: Եվ այդ խորհուրդն ապրելիս միշտ հիշում ես, որ նորածին Մանուկն ամեն վայրկյան ու ժամ մեզ հետ է, ով աշխարհ եկավ մեր փրկության համար: Մի ծնունդ, որ փոխեց ամեն ինչ. ժամանակն այլևս սկսեց այլ կերպ ընթանալ, մարդն իր կյանքը սկսեց արժևորել այլ չափանիշներով, և ամենակարևորը՝ Հիսուսի ծննդյամբ փարատվեց այն անորոշությունը, որ ապրում ենք ամենքս ինչ-որ ժամանակ՝ ինչո՞ւ ենք ծնվում, երբ մեկ օր պիտի մեռնենք հարցադրմամբ: Քրիստոսի ծննդյամբ և հրաշափառ հարությամբ այս խնդիրը լուծված է մեզ համար: Այսօր ուզում եմ փոքրիկ անդրադարձ կատարել Հիսուսի ծննդյան մի դրվագի վրա: Տեսեք, Տիրոջ ծննդյան ավետիսն առաջինը լսեցին պարզ հովիվները և ոչ թե ժամանակի մեծահարուստները կամ անվանի մարդիկ: Ընդհանրապես հովիվները մաքուր սրտով, արթուն մտքով և անկեղծ մարդիկ էին, ովքեր անխոնջ և նվիրվածությամբ իրենց հոտն էին պահպանում: Եվ ահա Աստված հենց նրանց ընտրեց՝ ցույց տալով, որ նմանատիպ մարդիկ տեղ ունեն Աստծո ծրագրի և արքայության մեջ: Եթե մենք էլ այդ հովիվների նման լինենք, ապա Աստված անպայման կայցելի մեզ և կդարձնի Իր կարևոր առաքելության իրականացողներից մեկը: Ուստի, եկե՛ք բացենք մեր սրտերը Տիրոջ առաջ և փորձե՛նք նմանվել այն հովիվներին, ի՞նչ գիտենք՝ գուցե Աստված մեկ այլ ծրագիր էլ մեզ հետ ունի........:
