Վառ, տաք ու կենդանի գույներ՝ Պան Տու Տրենգի 28 կտավներում
16:45 , 3 մարտ, 2014Ժամանակակից նկարիչներից այսօր կանդրադառնանք վիետնամացի տաղանդավոր գեղանկարչուհի Պան Տու Տրենգին: Տրենգը ծնվել է 1981թ.-ին՝ Հանոյում: 2004թ.-ին ավարտել է Հանոյի թատրոնի և կինոյի համալսարանը: Նկարչուհին Վիետնամի երիտասարդ նկարիչների միության անդամ է: 1999թ.-ից ի վեր նա մասնակցել է բազմաթիվ անհատական ու խմբակային ցուցահանդեսների:
Նկարչուհին հիմնականում բնապատկերներ է նկարում: Սա, թերևս, շատ գեղանկարիչների համար սիրված թեմա է, սակայն նկարչուհին ունի իրեն հատուկ յուրաօրինակ ոճ: Նա առանձնանում է իր հետաքրքիր մինիմալիստական ձեռագրով, որը նրբորեն ընդգծված է վառ ու կենդանի գույներով:
Նկարչուհին սիրում է իր ստեղծագործություններում անդրադառնալ գյուղական գեղեցիկ ու կենդանի կյանքին: Իր գեղանկարներում նա ոչ թե նկարագրում է այն ինչ տեսել է, այլ այն, թե ինչ է զգացել` ապրելով կամ այցելելով այս վայրեր:
Գեղանկարչուհին ունի ստեղծագործելու հետաքրքիր տեխնիկա: Նա ավելի քիչ է օգտագործում վրձին ու փոխարենը ստեղծագործում է ներկապնակի դանակով ու մերկ մատներով:
Հիշեցնենք, որ նախորդ անգամ անդրադարձել էինք Ջոուել Ռեային ով յուրահատուկ ձևով կարողացել էր միաձուլել հիպերռեալիզմի ու սյուրռեալիզմի ոճերը: