Tert.am-ը գրում է.
«Իմ քայլը» խմբակցության պատգամավոր, ԱԺ պաշտպանության և անվտանգության հարցերի մշտական հանձնաժողովի անդամ Տիգրան Կարապետյանի խոսքով՝ ինքը հիմա չի կարող նշել այն նախկին բարձրաստիճան պաշտոնյաների անունները, որոնք կանչվելու են ապրիլյան պատերազմի պատճառները պարզող հանձնաժողով: Նա Tert.am-ի հետ զրույցում նշեց, որ չի կարող դա անել, քանի որ պետք է պահպանի գաղտնիության պայմանները, սակայն այդ մարդկանց շրջանակը շատերի համար պարզ է:
«Անուններ ես այս պահին չեմ տա: Դրանք այն մարդիկ են, որոնք այդ շրջանում զբաղեցրել են բարձր զինվորական պաշտոններ, եղել են պատասխանատուներ որոշակի շրջանակների և այլն, և այլն: Կոնկրետ անուններ մենք կտանք, երբ այդ մարդիկ հրավիրվեն, լինեն հանձնաժողովում»,- ասաց նա, ապա հավելեց, որ այս պահին իրենք կոնկրետ անուններ չունեն էլ:
Հարցին՝ հրավիրվելու է նաև պաշտպանության նախկին փոխնախարա՞րը, Տիգրան Կարապետյանը պատասխանեց․ «Պաշտպանության նախկին փոխնախարարը, ներկայիս նախարար, նախկին նախարար․ որևէ մեկին կանչելու հարցում մենք կաշկանդված չենք: Բոլոր այն մարդիկ, որոնք ապրիլյան պատերազմի ընթացքում, դրան հաջորդող կամ նախորդող շրջանում զբաղեցրել են պաշտոններ և կարող են ունենալ տեղեկատվություն, այդ բոլոր մարդիկ հրավիրվելու են հանձնաժողով»,- ասաց նա:
Մեկ այլ հարցին, թե անհարմար իրավիճակ չի՞ ստեղծվում ներկայիս պաշտպանության նախարարին հարցեր հնչեցնելիս և ինչ հարցեր են ընդհանրապես «Իմ քայլը» խմբակցության պատգամավորները նրան ուղղում, ԱԺ պատգամավորը պատասխանեց․
«Դավիթ Տոնոյանը հանձնաժողովում չի եղել, և որևէ անձ այս հանձնաժողովում չի եղել: Ինչ վերաբերում է «Իմ քայլին», ապա սա «Իմ քայլը» չի, այլ ԱԺ պաշտպանության և անվտանգության հանձնաժողովն է, որտեղ ներկայացված է ամբողջ Ազգային ժողովը՝ և՛ Բարգավաճ Հայաստանը, և՛ Լուսավոր Հայաստանը»,- ասաց նա՝ նշելով, որ իրենց հանձնաժողովի գործառույթն է ստեղծել քննիչ հանձնաժողով, որը վերաբերում է Զինված ուժերին:
Ամբողջական հոդվածը կարող եք կարդալ այստեղ
