Armeniasputnik.am-ը գրում է.
Հայաստանը չպետք է ընդառաջ գնա ՀԱՊԿ գլխավոր քարտուղարի նոր թեկնածուի ընտրությանը։ Sputnik Արմենիայի հետ զրույցում ասել է քաղաքական գործիչ, Դեմկուսի նախագահ Արամ Սարգսյանը՝ խոսելով ՀԱՊԿ գլխավոր քարտուղարի նոր թեկնածուի շուրջ ստեղծված խնդրից։
«Հայաստանը չպետք է համաձայնի ՀԱՊԿ նախագահի բելառուս թեկնածուին։ Ես ճիշտ կհամարեի, որ մեր ղեկավարությունը ընդառաջ չգնար այս առաջարկին, պահպանի իր դիրքորոշումը, արդյունքում Սեմերիկովը կպահպանի իր դիրքը և շարունակի ղեկավարել մինչև հաջորդ ընտրություններ»,- ասել է Սարգսյանը։
Ըստ քաղաքական գործչի՝ վարչապետի ասուլիսից հասկանալի դարձավ, որ հայկական կողմը պատրաստ է կոմպրոմիսի։ Սարգսյանը կարծում է, որ այդ կոմպրոմիսը չպետք է լինի Բելառուսի թեկնածուին հավանություն տալը։ Դա կոմպրոմիս չի լինի։
Հիշեցնենք` ՀԱՊԿ գլխավոր քարտուղարի նոր թեկնածուի մասին փաստաթղթերն ուղարկվել են անդամ երկրներին։ Բելառուսը առաջադրել է Անվտանգության խորհրդի ղեկավար Ստանիսլավ Զասի թեկնածությունը։ ՀԱՊԿ անդամ երկրներից Հայաստանն ավելի վաղ համաձայնություն չէր տվել այդ պաշտոնում Բելառուսի Անվտանգության խորհրդի ղեկավար Ստանիսլավ Զասի նշանակմանը:
Եթե թեկնածուի շուրջ համաձայնության չգան, ՀԱՊԿ-ն առաջիկա 1 տարում կմնա առանց նոր գլխավոր քարտուղարի։ Պաշտոնը կղեկավարի ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը:
