Գյուղատնտեսական արտադրանքի շարժի ընթացակարգերի պարզեցումը և հեշտացումը հնարավորություն տվեց ՀՀ-ին ավելացնել պտուղ-բանջարեղենի արտահանման ծավալները: Եթե նախկինում արտահանողը պետք է հավաքեր բազմաթիվ տեղեկանքներ, ապա ԵԱՏՄ-ին անդամակցելուց հետո պահանջվում է ընդամենը մեկ հավաստագիր:
Ինչ վերաբերում է արտահանման ծավալներին ապա, նախորդ տարի Հայաստանից արտահանվել է 76 հազար 678 տոննա պտուղբանջարեղեն՝ 2014թ. 46 հազար 459 տոննայի դիմաց։
Արտադրանքի զգալի մասը արտահանվել է ՌԴ: Մասնավորապես ռուսական շուկա է արտահանվել 63 հազար 919 տոննա պտուղբանջարեղեն, որը կազմել է ընդհանուր ծավալի շուրջ 83 տոկոսը: Համեմատության համար նշեմ, որ 2014թ. այդ երկիր արտահանվել է 21 հազար 537 տոննա, որը կազմել է արտահանման ընդհանուր ծավալի 45.5 տոկոսը։
Վրաստան է արտահանվել է 12 հազար 188 տոննա պտուղ-բանջարեղեն, Բելառուս՝ 312 տոննա, Ղազախստան՝ 176 տոննա, այն դեպքում, երբ 2014թ. Ղազախստան արտահանվել է ընդամենը 18 տոննա հայկական պտուղբանջարեղեն։
Ավելացել է նաև խաղողի արտահանումը: 2014թ. ութ հազար տոննայի դիմաց նախորդ տարի արտահանվել է 13 հազար 86 տոննա:
