Tert.am-ը գրում է.
Tert.am-ի հետ զրույցում ԱԺ փոխնախագահ ՀՀԿ խոսնակ Էդուարդ Շարմազանովը հայտնեց, որ սահմանամերձ գյուղերի բնակիչները ոգևորված են Նախագահի՝ ՄԱԿ ում հնչեցրած ելույթով: Նա անդրադարձ կատարեց նաև Սահմանադրության բարեփոխումների նախագծի՝ ԱԺ-ում քվեարկությանը և հարցին, թե ով կարող է լինել Նախագահի մատնանշած՝Հայաստանի ապագա քաղաքական առաջնորդը:
-Պարո՛ն Շարմազանով, ՀՀ Նախագահի՝ «Կարնեգի հոլում» արված հայտարարությունը, որ «կարող եմ կանխատեսել, թե ով կարող է լինել Հայաստանի ապագա առաջնորդը, բայց վախենամ՝ եթե հայտարարեմ, ապա այդ մարդը դժոխային օրեր կունենա մինչև առաջնորդ դառնալը», ինչպե՞ս է ընկալվել Հանրապետական կուսակցության շարքերում: Ի դեպ, արդեն անեկդոտիկ պատմություններ են շրջանառվում, որ կուսակցությունում բոլորը մտածում են` «կարո՞ղ է այդ անձը ես եմ»:
-Բարձր եմ գնահատում անեկդոտներ հորինողների հումորի զգացումը, հումորով եմ վերաբերում անեկդոտներին: Այս հարցի հետ կապված կարող եմ ասել՝ պետք է դանդաղ շտապել, ժամանակը կգա, մենք էլ մեր կարծիքը կասենք: Փաստն այն է, որ ՀՀ Նախագահը պետք է լինի անկուսակցական:
Իսկ ինչ վերաբերում է հանրապետության Նախագահի ելույթներին, ինչպես «Կարնեգի հոլում» , այնպես էլ ՄԱԿ-ում, համարում եմ դրանք պատմական: Ե՛վ հրամայական առաջնորդի ելույթ էր, և՛ տարածաշրջանում խաղաղություն քարոզող առաջնորդի ելույթ: ՄԱԿ-ում շատ առաջնորդներ են ելույթ ունեցել, բայց առաջին անգամ ՀՀ առաջնորդը ՄԱԿ-ում ղարաբաղյան խնդրի վերաբերյալ հստակ ասաց, որ եթե համապատասխան կառույցները չկարողանան զսպել Ադրբեջանին, ապա Հայաստանը կիրականացնի ռազմաքաղաքական ու իրավական քայլեր: Այսինքն՝ հստակ ընդգծվեց, որ մենք միմիայն խաղաղ լուծումների կողմնակից ենք, բայց եթե միջազգային հանրությունը չի կարող Ադրբեջանին պարտադրել խաղաղություն, կպարտադրի ՀՀ-ն՝ որպես Հայաստանի ու Արցախի ժողովրդի անվտանգության երաշխավոր: Եվ կարծում եմ, որ յուրաքանչյուր առաջնորդի խնդիրն է քայլեր ձեռնարկել իր քաղաքացիների անվտանգության համար: Եվ այդ ելույթը ոգևորիչ էր, ես դրանից մի քանի օր հետո եղել եմ սահմանամերձ գյուղերում, հանդիպել եմ գյուղացիների հետ, որոնք շատ ոգևորված են Նախագահի ելույթով:
-Զինվորականներն են անկուսակցական, Սահմանադրական դատարանի նախագահը, և այլոք:
-Դրա համար եմ ասում՝ դանդաղ շտապեք, մի ծանրաբեռնեք ձեր ուղեղները:
- Նախագահը խոսեց նաև «Էլեկտրիկ Երևանի» մասին, ասաց, որ ՀԾԿՀ որոշումը հիմնավորված էր, աշխարհաքաղաքական աղերսների համատեքստում ասաց, որ ամեն ինչի համար պետք է վճարել, որ չի կարելի լինել անկախ և չվճարել, և այլն:
-Նախագահն ասաց, որ քաղաքացիների դժգոհությունը հասկանալի է, բայց, բնականաբար, նաև այդ բարձրացումն էլ օբյեկտիվ պատճառներ ունի: Այն, ինչ մենք ասում ենք մշտապես: Իհարկե, ցանկացած թանկացում չի կարող չմտահոգել որևէ երկրի իշխանության, այդ թվում` ՀՀ իշխանությանը, որովհետև ցանկացած թանկացում իր հետ բերում է որոշակի սոցիալական բեռ: Իսկ մեր երկրում կան բազում խնդիրներ: Մյուս կողմից, մենք պետք է նայենք՝ սա օբյեկտի՞վ է, թե ոչ: Եվ մյուս կողմից, իհարկե, լիակատար անկախ երկրներ չկան: Նույնիսկ ԵՄ անդամ երկրները: Այսինքն` կա ռազմական անվտանգություն, կա տնտեսական, կա էներգետիկ անվտանգություն և անկախություն: Եվ այդ առումով, չեմ կարծում, որ նոր հեծանիվ պետք է հորինենք: Կրկնում եմ` Եվրոպան կախվածության մեջ է ռուսական նավթից, որոշ երկրներ կախվածության մեջ են ադրբեջանական նավթից:
-Մենք ումի՞ց կամ ինչի՞ց ենք կախվածության մեջ:
-Եթե նայում ենք հարցին տնտեսական տեսանկյունից, բնականաբար էներգետիկ ռեսուրսների կարիք մենք չունենք: Բայց ամենակարևորն այն է, որ այդ ամենը մենք ուղղում ենք ոչ թե կախվածությանը, այլ մեր պետության բալանսավորման ու անվտանգության ամրապնդման ու հզորացման համար: Խնդիրը սրա մեջ է, և աշխարհում բացարձակ անկախ երկրներ չկան: Եվ այնպես չէ, որ մեկուսացված ապրես. աշխարհում ցանկացած կետում` ցանկացած հարց ազդում է։ Սիրիայում պատերազմ է, քո վրա պետք է ազդի, ռուս-վրացական պատերազմ է՝ ազդի, թուրք-քրդական բախում է, ազդի…Նավթի գները իջնում են, մեզ վրա պետք է ազդի, պղնձի գները իջնում են, մեզ վրա պետք է ազդի, մենք պղինձ ենք արտահանում, գները իջնում են, մեր բյուջեի վրա երևում է: Հիմա սա կախվածությո՞ւն , թե ոչ:
-Պարո՛ն Շարմազանով, բյուջեի քվեարկության պատկերը՝ իր «դեմ»-երով, «կողմ»-երով ու «ձեռնպահ»-ներով, Ձեր համար սպասելի՞ էր, թե ոչ:
-Փաստն այն է, որ ԱԺ քվեարկությունը ցույց տվեց, որ կա քաղաքա-իրավական փաստաթղթի շուրջ իրավական կոնսոլիդացիա: Եվ այն, որ դրան ԱԺ-ում ընդամենը 10 պատգամավոր է դեմ քվեարկում, նաև ընդդիմության մեծամասնությունը կողմ է քվեարկում,վկայում է այն մասին, այն չպետք է դիտարկել ընդդիմություն-իշխանություն փոխհարաբերությունների դաշտում:
-Իսկ ՕԵԿ-ի ձեռնպահ լինե՞լը, մի քիչ անհասկանալի է, երբ Սահմանադրության հարցում դեմ չես կամ կողմ, այլ՝ ձեռնպահ:
-Որպես նժդեհյան գաղափարախոսության հետևորդ՝ չեմ սիրում չեզոքություն: Բայց դա իրենց կարծիքն է, ես դատավոր չեմ։
-Իսկ «Բարգավաճի» քվեարկությունը Ձեր համար սպասելի՞ էր:
-Այո, որովհետև Միքայել Մելքումյանը հայտարարել էր, նաև մենք տեսել էինք, որ վերջին ամիսներին նրանք իրենց հարցազրույցներում ասում էին, որ քաղաքական մենաշնորհի խնդիր չկա, որ այս Սահմանադրությունն ավելի առաջադիմական է, և այլն: Ինձ համար անակնկալ չէր:
-Հանրաքվեի անցկացման նախընտրական շտաբ ե՞րբ է ձևավորվելու, ինչպե՞ս է իրականցվելու քարոզարշավը: Նման հարց քննարկե՞լ եք։
-Օրենքով սահմանված կարգով՝ ԱԺ նախագահը մինչև 7-օրյա ժամկետում նախագիծը պետք է ուղարկի ՀՀ Նախագահին, ով ունի հանրաքվեի օր նշանակելու լիազորություն: Հանրաքվեի օրը պարզ կլինի, այդ ժամանակ արդեն կձևավորվեն շտաբեր:
-Սովորաբար, ՀՀԿ-ի նախընտրական շտաբի պետը լինում է Հովիկ Աբրահամյանը, այս անգամ և՞ս այդ ավանդույթը կշարունակվի:
-Այս հարցի պատասխանը իմ լիազորությունների շրջանակում չէ:
