«Իրատես de facto»-ն գրում է.
«Հովիկ Աբրահամյանի դեմ լուռ «ընդվզում» է հասունանում` իր իսկ ղեկավարած կառույցում, իր իսկ թիմակիցների շրջանում։ Մեր աղբյուրների փոխանցմամբ, ՀՀԿ խմբակցությունից շատերը, հատկապես նիստերի օրերին, հազիվ էին իրենց զսպում, որ բարձրաձայն չարտահայտեն իրենց դժգոհությունն օրենսդիր մարմնի աշխատանքները ճիշտ չկազմակերպելու առնչությամբ։
Վերջիններիս համբերության բաժակը վերջնականապես լցվեց անցած քառօրյայում, երբ շուրջ հիսուն րոպե Աժ օրակարգը հնարավոր չէր հաստատել (Հովիկ Աբրահամյանը զբաղված էր ընդդիմադիր պատգամավորների հետ խոսքուզրույցով)։ Իհարկե, որոշ ՀՀԿ-ականների նյարդերը տեղի տվեցին, բայց միայն նրանք չէին, որ Աբրահամյանին մտովի «գահընկեց» արեցին։
Ինչպես մեր աղբյուրներն են տեղեկացնում, դահլիճում դժգոհ են թիմակիցները, կառույցում՝ աշխատողները, խորհրդարանում էլ ատեստացիաներ են անցկացվում, իսկ թե ով պետք է «անցնի», որոշում է Աբրահամյանի հովանավորությունը վայելող Արփինե Հովհաննիսյանը։ Խորհրդարանում շատերն են դժգոհ այս երիտասարդ պատգամավորուհուց, քանի որ երկար տարիներ օրենսդիր մարմնում աշխատող կադրերը շատ հեշտությամբ կարող են հրաժեշտ տալ իրենց աշխատանքին, եթե սույն օրիորդը ցանկանա։
Ի դեպ, պատգամավորի օգնականներից մեկը մեզ հետ զրույցում մի ուշագրավ դրվագ հիշեց, թե ինչպես Աժ միջանցքում ականատես է եղել Դավիթ Հարությունյան-Արփինե Հովհաննիսյան խոսակցությանը, որի ժամանակ ինչ-որ հարցի առնչությամբ վերջինս, մեղմ ասած, բարձր տոնով իր դժգոհությունն է հայտնել Հարությունյանից»:
Մանրամասները՝ թերթի այսօրվա համարում։