Armenpress.am-ը գրում է.
«Կանաչապատում և շրջակա միջավայրի պահպանություն» ՀՈԱԿ-ի ձեռք բերած 2000 ծառերից 1000-ը գալու են փոխարինելու Երևանում կենսունակությունը կորցրած ծառերին, մյուս կեսը լրացնելու են Երևանի կանաչ ֆոնդը:
«Արմենպրես»-ի հաղորդմամբ՝ այս մասին «Անտառների միջազգային օրվա» առթիվ նշեց «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյան՝ ներկայացնելով գարնանային տնկարկի նախապատրաստական աշխատանքներն ու 2024 թվականին նախատեսվող ծրագրերը:
«2022 թվականից սկսած կազմակերպությունը Երևանի կանաչ ֆոնդի հետ կապված հիմնական 4 ռեֆորմ է իրականացանում: Նախքան դա, իրականցվել են փոքր ծրագրեր և ծառատունկեր: Ուսումնասիրություններ անելով՝ կարող ենք փաստել, որ ամեն տարի Երևանում 50 հազար ծառ է տնկվել, բայց այսօր այդ ծառերը քաղաքում հնարավոր չէ գտնել: Առաջին ռեֆորմի շրջանակում կարող ենք հայտարարել, որ Երևան քաղաքը չի ներկրելու այդ շիվերը, ինչը ժամանակին տնկվում էր Երևանում, որովհետև դրանք այդպես էլ ծառեր չէին դառնում: 2022 թվականից ի վեր Երևանը ձեռք է բերում շուրջ 10 տարեկան հասուն, կայացած, արդեն ձևավորված սաղարթով և ֆունկցիոնալ, ինչպես նաև գեղազարդություն ապահովող ծառեր»- ներկայացրեց նա:
Բեգոյանը նշեց՝ «Կանաչապատում և շրջակա միջավայրի պահպանություն» ՀՈԱԿ-ը մինչև 2022 թվականը երբեք չէր զբաղվել անտառներ հիմնելով: Նա հիշեցրեց, որ երկրորդ ռեֆորմի շրջանակում 22-23 թվականների ընթացքում Երևանում հիմնվել է շուրջ 35 հազար հեկտար անտառ, 2024-ին կհիմնվի ևս 10 հեկտար:
Երրորդ ռեֆորմը, նրա խոսքով, վերաբերում է կենսունակությունը կորցրած ծառերի փոխարինման ծրագրին: Նա տեղեկացրեց՝ 2000 արժեքավոր և գեղազարդ ծառատեսակ է այս պահին գտնվում տնկարանային տնտեսությունում, որից 1000 կփոխարինի կենսունակությունը կորցրած ծառերին:
«Մենք բողոքում ենք, որ կանաչ ֆոնդը քիչ է, սա արդարացի բողոք է: Այդ կանաչ ֆոնդի 40-50 տոկոսը զբաղեցված է ոչնչով: Այս պահին Երևան քաղաքում խնդրահարույց են թեղի և բարդի տեսակի ծառերը, իսկ սոսիները, որոնք հարյուրավոր տարիների կյանք ունեն, մեր հպարտությունն են ու դրանք փոխարինելու չեն: Թեղին Երևան քաղաքի համար նպատակահարմար տեսակ չէ, դրանց կյանքը 40-50 տարի է: Երևանում դրանք տնկվել են 1940-50-ականներին: Բացի այն, որ դրանք իրենց կյանքն ապրել են, նաև վարակի աղբյուր են, որոնց նույնիսկ թունաքիմիկատները փրկել չեն կարողանում: Դրանց 15 օր առողջ տեսնելու համար անհրաժեշտ է թունաքիմիկատը նորմայից շատ օգտագործել, որն էլ արդեն քաղաքացիների առողջությունն է վտանգում: Նշեմ նաև, որ դրանք քամու, ձյան ու անձրևի ժամանակ հեշտ տապալվող ծառեր են: Օրերս անձրևների հետևանքով 6 տապալման ականատես եղանք: Ստացվում է, որ մենք քաղաքի տնկարանները անիմաստ զբաղեցնում ենք»,- մեկնաբանեց նա:
Բեգոյանը վստահեցրեց՝ այն ծառատեսակները, որոնք գալիս են փոխարինելու կենսունակությունը կորցրածներին, ապահովելու են այն ստվերը, որն անհրաժեշտ է: Նա նաև հավելեց՝ թեղիները հատվածական փոխարինել հնարավոր չի լինի, քանի որ դրանք կվարակեն արդեն առողջ ծառերին: Նա նաև տեղեկացրեց՝ ընտրված ծառատեսակները, որոնք գալիս են փոխարինելու կենսունակությունը կորցրածներին, քննարկվել են նորաստեղծ գիտական խորհրդի կողմից:
«Իմ կողմից ստեղծվել է գիտական խորհուրդ, որտեղ հրավիրվել են ոլորտի մասնագետներ, գիտնականներ, դոկտոր պրոֆեսորներ, ակադեմիայի թղթակից անդամներ և այլն: Նրանք աշխատում են հանուն Երևանի, առանց գումարի: Դենդրոլոգների առաջարկած խորհուրդներն ուղարկվում են խորհուրդ, որտեղ մասնագետները քննարկում և որոշում են՝ որ ծառատեսակն է հարմար Երևան քաղաքին և որ մասում: Միայն խորհրդի եզրակացություններից հետո է, որ ես կայացնում եմ որոշում այս կամ այն բուսատեսակի ձեռք բերման համար գնումներ իրականացնել»,- ասաց Բեգոյանը:
Չորրորդ ռեֆորմը վերաբերում է հարյուր հազարավոր ծառեր ու թփատեսակներ ներկրելուն, դրանից զատ, Երևանի ջերմոցատնկարանային տնտեսությունը ընդլայնելուն:
Բեգոյանը նշեց, որ նախատեսում են ջերմոցատնկարանային տնտեսությունում աճեցնել կաղնիներ, սոսիներ, թխկիներ և ևս մի քանի տեսակներ՝ ընդգծելով, որ Երևանում օգտագործվելու են խիստ ֆունկցիոնալ և արժեքավոր ծառատեսակներ: «Կանաչապատում և շրջակա միջավայրի պահպանություն» ՀՈԱԿ-ն արդեն այս տարի կունենա 20 հա տարածք զբաղեցնող տնկարան: Նախագծի շրջանակում կներդրվեն ժամանակակից սարքավորումներ ու համակարգեր:
