Lurer.com-ը գրում է.
Սեպտեմբերի 19-ին՝ ժամը 19:00-ին, Երևանի Մարզահամերգային համալիրում տեղի կունենա ՌԴ «Հոկեյի լեգենդներ» և «Գրադ» հոկեի ակումբների ցուցադրական ընկերական հանդիպումը՝ ի պատիվ հոկեի հայազգի առաջին օլիմպիական չեմպիոն Գրիգոր Մկրտչյանի: Այս տարի լրացել է Կրասնոդարում ծնված հայազգի լեգենդար չեմպիոնի մահվան տասներորդ տարին: Տափօղակով հոկեյի մեծանուն վարպետն օժտված է եղել դարպասապահի բնածին տաղանդով և ԽՍՀՄ հավաքականի դարպասը մշտապես պահել է անառիկ. տեղեկացնում է msy.am-ը:
Գ.Մկրտչյանի մարզական ընկերները՝ «Հոկեյի լեգենդներ» ակումբի անդամները, գնահատելով հայ մարզիկի վաստակը՝ նրա տասներորդ խնկելի հիշատակին նվիրված միջոցառման նախաձեռնությամբ դիմել են Հայաստանի Հանրապետության կառավարությանը:
ԽՍՀՄ տասնյակ մեդալների և շքանշանների ասպետի մեծարման պաշտոնական միջոցառումների ծրագիրն իրականացնում են՝ ՀՀ-ից ՀՀ նախագահի աշխատակազմը, կառավարությունը, սպորտի և երիտասարդության հարցերի նախարարությունն ու ՀԱՕԿ-ը, ՌԴ-ից՝ ԱՊՀ սահմանապահ զորքերի Կոորդինացիոն ծառայությունը, ՀՀ-ում ՌԴ դեսպանատունը, ՌԴ ԴԱԾ Սահմանապահ վարչությունը ՀՀ-ում, «ТЭН» ընկերության խումբը, «Հոկեյի լեգենդներ» և «Գրադ» հոկեյի ակումբները:
Մասնակիցները Մոսկվայից Երևան կժամանեն սեպտեմբերի 18 –ին , ժամը 13 անց 30 –ին:
Սեպտեմբերի 18-ին հանրահայտ մարզիկները կբարձրանան Ծիծեռնակաբերդի հուշահամալիր, իսկ սեպտեմբերի 19-ին՝ ժամը 17:00-ին, ՄՀՀ-ում նախատեսված է ՀՀ-ում ՌԴ դեսպան Իվան Վոլինկինի, նախաձեռնության հեղինակ Ալ.Գվոզդևի և Ալ.Յակուշևի հանդիպումը՝ միջոցառմանը հավատարմագրված լրագրողների հետ, ինչից հետո ՄՀՀ-ում կմեկնարկի «Հոկեյի լեգենդներ» և «Գրադ» հոկեյի ակումբների մրցամարտը:
Սեպտեմբերի 19-ին լեգենդար թիմերը սահադաշտ դուրս կգան հետևյալ կազմով՝ « Հոկեյի լեգենդներ» ակումբից՝ օլիմպիական խաղերի, աշխարհի, Եվրոպայի բազմակի չեմպիոններ, ԽՍՀՄ սպորտի վաստակավոր վարպետներ դարպասապահ` Վլադիմիր Միշկին, պաշտպաններ Վլադիմիր Լուտչենկո, Սերգեյ Բաբինով, Յուրի Լապկին, Ալեքսանդր Գվոզդև, հարձակվողներ` Իրեկ Գիմաև, Ալեքսանդր Գոլիկով, Վլադիմիր Գոլիկով, Վիկտոր Շալիմով, Իգոր Միշուկով, Ռոման Իլյին, Եվգենի Դավիդով, Անդրեյ Կովալենկո և Ալեքսանդր Յակուշև:
«Գրադ » մարզակումբից՝ դարպասապահ Սերգեյ Բարզանով, պաշտպաններ Օլեգ Բուրլուցկի, Ռուսլան Գուտնով, Ալեքսանդր Ստեպանով, հարձակվողներ` Սերգեյ Ժեբրովսկի, Նիկոլայ Կոպիտին, Ալեքսանդր Շաշկով, Ալեքսեյ Ուստինով, Օլեգ Կոզին, Ալեքսանդր Ժեվելյուկ և Վլադիմիր Սիմակով: