1in.am-ը գրում է.
Սիրիական կառավարությունը հերքում է «կեղծ փաստարկները», որոնք ուրբաթ իր ելույթում հնչեցրել է ԱՄՆ պետքարտուղար Ջոն Քերին: Այս մասին հայտնել է Սիրիայի ԱԳՆ-ն:
Ամերիկյան արտաքին քաղաքական գերատեսչության ղեկավարը, ով միջազգային հանրությանը խոստացել էր հրապարակել «անհերքելի ապացույցներ», ըստ էության կրկնել է մտացածին պատմությունը, որը հորինել է Սիրիայի սահմաններից դուրս գտնվող ընդդիմությունը՝ օտարերկրյա ռազմական միջամտությունն արդարացնելու համար՝ նշել է ԱԳՆ-ն:
«Սիրիայի կառավարության մոտ զարմանք է առաջացրել այն, որ Քերիի կողմից ներկայացված կեղծ փաստարկները վերցված են սոցցանցերից: Ինչպե՞ս կարող է նման մեծ տերությունը, ինչպիսին Ամերիկան է, պատերազմի ու խաղաղության մասին որոշում ընդունել՝ հիմնվելով կասկածելի տվյալների վրա»,- ԱԳՆ հայտարարությունը մեջբերում է ITAR-TASS-ը:
«Սիրիացի ժողովրդի մասին հոգածության կեղծ պատրվակի ներքո պետքարտուղարը հասարակական կարծիքը մոլորության մեջ է գցում և ցանկանում է արդարացնել ներխուժումը, որը կհանգեցնի հարյուրավոր անմեղ քաղաքացիների մահվան»,- ասվում է փաստաթղթում: