ԼՈՍ ԱՆՋԵԼԵՍ, TMZ
Ամերիկահայ միլիարդատեր Քըրք Քըրքորյանը վերջապես անձամբ պատասխանեց իր շուրջն աղմուկ առաջացրած հարցերին՝ նախկին կնոջը բնորոշելով որպես սովորական ստախոս և անկուշտ մարդ։
96-ամյա Քըրքորյանի նախկին կինը՝ Լայզա Բոնդերը, վերջերս դատարան է դիմել և պնդել, թե Քըրքորյանի ընկերության մյուս բաժնետերերը նրան պատանդ են առել և թույլ չեն տալիս շփվել մասնավորապես իր 15-ամյա դստեր հետ։ Նա դատարանից պահանջել է վերականգնել հոր և դստեր շփումները, իրեն Քըրքորյանի խնամակալը ճանաչել։
Դատական այս հայցի առիթով Քըրքորյանն ասել է. «Միակ մարդը, որի համար Լայզա Բոնդերը երբևէ հոգ է տարել և խնամել է, Լայզա Բոնդերն է»։ Հիշեցրել է, որ նրա ստախոս լինելը դեռ տարիներ առաջ է ապացուցվել, երբ պնդում էր, թե Կիրան Քըրքորյանի երեխան է, մինչև ԴՆԹ-ի հետազոտությունը հերքեց այդ փաստը։
Չնայած Քըրքորյանը Կիրայի կենսաբանական հայրը չէ, բայց աղջկա խնամքի համար ալիմենտ և այլ մեծ գումարներ է վճարել։ Սակայն, նրա խոսքով, Լայզայի ագահությունը դրանից ոչ մի կերպ չի հագեցել։ Քըրքը համաձայնել էր ամսական 50 հազար դոլարի ալիմենտ վճարել, Լայզան 100 հազար էր պնդել։ Երբ Քըրքը համաձայնել էր 100 հազարին և միանվագ 10 միլիոն էլ փոխանցել, որպեսզի իրեն հանգիստ թողնի, Լայզան ամսական 500 հազար դոլարի ալիմենտ էր պահանջել։
Քըրքորյանի կարծիքով, այժմ էլ Լայզան խնամակալության հարց է բարձրացնում, քանի որ այդկերպ իրենից ավելի ու ավելի շատ գումար կարող է կորզել։
Նյութի աղբյուրը
