Յուրաքանչյուր երկիր ունի իր տեսարժան վայրերը, որոնք իրենց մեջ պարփակում են ժողովրդի բնավորությունն ու երկրի ողջ գեղեցկությունը, և այնպիսի երևույթներ, որոնք արտացոլում են դրանք: Ձեզ ենք ներկայացնում այն կարևորագույն գործողությունները, որոնք Հայաստան այցելելիս պետք է անի յուրաքանչյուր զբոսաշրջիկ:
Տոլմա համտեսել տոլմայի հայրենիքում
Տոլման հայկական ագային ուտեստ է, որը հայտնի է գրեթե ողջ աշխարհին: Գաղտնիք չէ, որ յուրաքանչյուր ուտեստ ամենահամեղն այնտեղ է լինում, որտեղ դրա հայրենիքն է, հետևաբար տոլմա անհրաժեշտ է համտեսել հենց այստեղ: Բացի տոլմայից՝ Հայաստանում հարկավոր է փորձել մի շարք ազգային ուտեստներ ևս, որոնք յուրաքանչյուր զբոսաշրջիկի ճամփորդություն կվերածեն անմոռանալի տոնի։
Լողալ Սևանում և տեղի իշխան համտեսել
Ե՛վ հայաստանցիները, և՛ Հայաստանի հյուրերն ուղղակի պաշտում են Սևանա լիճը, առավելապես շոգ եղանակին, որը մոտենում է: Հայերի պարծանքը համարվող Սևանում կարող եք համտեսել նաև իշխան ձուկ, որը միայն այստեղ կգտնեք: Այս լիճն այնքան սիրված և կարևոր է հայերի համար, որ այն հաճախ ծով են կոչում: Այստեղ գալիս չմոռանաք այցելել Սևանավանք, որը IX դ. վանական համալիր է:
Նայել աշխարհին արվեստագետի աչքերով
Հանրահայտ Սերգեյ Փարաջանովի տուն-թանգարանը գտնվում է Հայաստանի մայրաքաղաք Երևանում: Թբիլիսիից եկած հայը ցանկանում էր ապրել հայկական մայրաքաղաքում, և այսօր այն տանը, որը կառուցված էր նկարչի համար, ցուցադրվում են Փարաջանովի՝ Հայաստանին նվիրված աշխատանքները:
Հայաստանի հոգևոր կենտրոն այցելություն կատարել
Էջմիածինը համարվում է աշխարհում առաջին պետական քրիստոնեական տաճարը: Այն կառուցվել է IV-V դարերում: Համալիրը ներառում է եկեղեցի, թանգարան, որտեղ պահպանվում են պատմական կարևոր մասունքներ, ինչպես նաև այստեղ է գտնվում կաթողիկոսի նստավայրը:
Ծանոթանալ հայկական գորգագործությանը և գորգ ձեռք բերել
Երևանի Վերնիսաժում կարող եք տեսնել հայ վարպետների ձեռքի շատ աշխատանքներ՝ ոսկե, արծաթե, թանկարժեք քարերից պատրաստված զարդեր, կտավներ, քանդակներ: Սակայն կարևորագույն նշանակություն ունեն հայկական ավանդական գորգերը, որոնք անհավատալի բարդ ու հետաքրքիր նախշեր ունեն:
Դուդուկի երաժշտությունը վայելել
Հայ ազգային խորհրդանիշներից է դուդուկը, որը փափուկ, սակայն միաժամանակ արտահայտիչ հնչողություն ունի: Դուդուկը պատրաստվում է հատուկ տեսակի ծիրանենու փայտից, որը գոյություն ունի միայն Հայաստանում: Այսօր դուդուկ երաժշտական գործիքը համաշխարհային հռչակ է վայելում, և դրա արձակած երաժշտությունը հնարավոր է լսել ամենահայտնի ֆիմերում ու երաժշտական կատարումներում:
Բարձրանալ Կասկադը
Երևանի սրտում՝ Կենտրնում գտնվող Կասկադը բազմաթիվ աստիճաններից բաղկացած ճարտարապետական համալիր է: Խոշորագույն համերգները, փառատոններն ու ֆլեշմոբերը հաճախ հենց այստեղ են անց կացվում:
Խմել աշխարհի ամենահամեղ ջուրը
Սա անելը բավականին դյուրին է, քանի որ Հայաստանի բոլոր քաղաքներում գրեթե ամեն քայլի վրա կհանդիպեք ցայտաղբյուրների, որոնցից մաքուր ու համեղ ջուր է հոսում:
Նստել ամենաերկար ճոպանուղին
Տաթևի տաճարը շրջապատող բնությունը դեռ երկար կպահպանվի զբոսաշրջիկի աչքերում: Այստեղ է գտնվում աշխարհում միաժամանակ և՛ ամենաերկար, և՛ ամենաբարձր ճոպանուղին, որից էլ կարող եք դիտել բնության այդ հրաշք տեսարանը:
Զբոսնել գիշերային Երևանում
Մայրաքաղաքում երեկոյան ժամերին զբոսնելը սովորույթ է տեղի բնակիչների համար, հատկապես ամառային ամիսների ընթացքում: Քաղաքի կենտրոնում, որտեղ շատ են հարմարավետ այգիներն ու սրճարանները, յուրաքանչյուրի ճաշակին և գրպանին համապատասխան միշտ կտեսնեք ծանոթ մարդկանց, կշփվեք հետաքրքիր մարդկանց հետ և ուղղակի կվայելեք երեկոյան երևանյան հանգստությունը:
