Թիրախային խմբերում այս տարի առնվազն երկու տոկոսով պատվաստումների ցուցանիշի անկում է գրանցվել: Արդյունքում ավելացել են կապույտ հազի դեպքերը: Մարտի 30-ին լրագրողների հետ հանդիպմանը ՀՀ առողջապահության նախարարության իմունականխարգելման ազգային ծրագրի ղեկավար Գայանե Սահակյանը նշեց՝ հիվանդների 80 տոկոսը չպատվաստվածներն են, մնացածը՝ թերի պատվաստվածները:
«Այս տարի կապույտ հազի գրեթե 7.5 անգամ աճ է գրանցվել նախորդ տարվա նույն ժամանակամիջոցի համեմատ: Նախորդ տարի այս ժամանակում ունեցել ենք կապույտ հազի ընդամենը 4 հաստատված դեպք, այս տարի արդեն՝ 30: Հիվանդների 80 տոկոսը չպատվաստվածներ են, մնացածը՝ թերի պատվաստվածները: Նրանց 60 տոկոսը մինչև 1 տարեկան երեխաներն են՝ կապույտ հազի համար ամենախոցելի խումբը: Այս տարիքային խմբում հիվանդությունն ուղեկցվում է բարդություններով, իսկ եթե իմունային համակարգը լավ չի գործում, կարող են լինել վատթարագույն ելքեր»,- ասաց Սահակյանը:
Խոսելով վերջին շրջանում կապույտ հազից 2 ամսական երեխայի մահվան դեպքի մասին՝ Սահակյանը նշեց՝ երեխան պատվաստման տարիքի չի եղել, սակայն վարակվել էր 2 տարեկան 8 ամսական քրոջից, ով ևս պատվաստված չի եղել:
Մինչ 1 տարեկան երեխաների համար հիվանդության բարդություններ կարող են լինել թոքաբորբը, տրախիբրոնխիտը և այլն:
Կապույտ հազի նախանշաններից են՝ հազը, ջերմության բարձրացումը, քթահոսությունը: Ժամանակի ընթացքում հազը դառնում է երկարատև, նոպայաձև, առաջանում է խեղդվելու զգացողություն: Սահակյանը խիստ կարևորեց հատկապես մինչ 1 տարեկան երեխաներին անպայման հիվանդանոցային պայմաններում բուժելը: Պահանջվում է երկարատև հակամանրէային բուժում: Անհրաժեշտ է հետևել նաև սննդակարգին, օգտագործել չգրգռող ուտելիքներ:
«Կանխարգելումը միայն պատվաստումն է: Թերի պատվաստումը ևս համաճարակաբանության տեսակետից բացասական ազդեցություն է ունենում»,- նշեց Սահակյանը:
