«Թե կուզես, սիրտս հանեմ, տամ, տամ, տամ», իսկ իրականում «Աննման յարս» երգը գարնան հիթն էր: Շատերը երգում էին առանց իմանալու, որ երգը կատարում է Արկադի Դումիկյանը, ով այս օրերին Երևանում է: Երգիչը չորս տարեկանից ապրում է Մոսկվայում, դպրոցական տարիքից զբաղվել է երգով, իսկ երաժշտական մրցույթներից միշտ վերադարձել է մրցանակներով: Արկադին նշում է, որ իր ամբողջ ընտանիքը երաժիշտներ են․ դա էլ՝ այն հարցի պատասխանը, թե ինչու է որոշել երգով զբաղվել: Շոու բիզնես մուտքը եղել է 2015 թվականին «Սիրտս քեզնով ջահելացելա» երգով, բայց երգչին ճանաչեցին «Աննման յարս» երգով: Նա հաճախ չի սիրում հարցազրույցներ տալ, այլ իր աշխատանքը ներկայացնում է տեսահոլովակներով. «Չեմ սիրում իմ նախնական պլանների մասին խոսել, սիրում եմ անել և ցույց տալ աշխատանքը: Սիրում եմ գործով ցույց տալ»: BlogNews.am-ը երևանյան զբոսանք է ունեցել երգչի հետ, լուսանկարել և զրուցել հիթային երգերի, առաջիկա նախագծերի մասին:
«Շատ անսպասելի էր ինձ համար, որ «Աննման յարս» երգն այդքան սիրվեց։ Այդ երգից առաջ մենք գնացել էինք Դուբայում տեսահոլովակ նկարահանելու, բայց երգը ոչ մի արձագանք չունեցավ: «Աննման յարս» երգը իմ ոճին և սրտին շատ մոտ է, բայց ես չէի մտածում, որ կարող է ժողովրդին էլ դուր գալ: Մենք երգի հիման վրա ներկայացրինք համերգային տեսահոլովակ, մտածում էինք՝ ի՞նչ իմաստ կա տեսահոլովակ նկարահանելու, եթե այդքան մեծ արձագանք չի ունենալու: Ի զարմանս մեզ՝ առաջին իսկ օրը Յութուբում տեղադրելուց հետո արձագանքներն այնքան շատ էին, որ միանգամից հիթ դարձավ: Պետք է ասեմ, որ ավելի շատ սիրվել է երգի դանդաղ հատվածը, որը սկզբում նախատեսված չէր: Մեքենա վարելու ժամանակ պարզապես երգեցի այդ հատվածը, զանգեցի երգի գործիքավորողին և ասացի, որ նման գաղափար ունեմ: Այդպես էլ ավելացավ դանդաղ հատվածը»,- պատմում է Արկադին:
Երգիչը նշում է, որ Հայաստանում նրան ճանաչեցին «Աննման յարս» երգով, չնայած դրանից առաջ ներկայացրել էր իր առաջին՝ «Սիրտս քեզնով ջահելացելա» տեսահոլովակը. «Այդ երգն իմ ստեղծագործական կյանքի բումն էր: Եղել են դեպքեր, երբ գնացել եմ համերգի, բայց ժողովուրդը չի իմացել, որ «Աննման յարս» երգը ես եմ կատարում: Այդ երգից հետո ես նկարահանեցի «Ангел мой» տեսահոլովակը։ Հպարտ եմ, որ իմ աշխատանքների մեջ նման գեղեցիկ տեսահոլովակ ունեմ: Ես միշտ փորձում եմ այնպիսի երգեր ներկայացրել, որ և՛ Ռուսաստանում ինձ լսեն, և՛ Հայաստանում. չեմ կարծում, որ ռուսերեն երգելու մեջ բացասական բան կա: Ունեմ այնպիսի լսարան, որը հայերեն չի հասկանում, ոմանք էլ իմ հայկական երգերը լսելով են սկսել ինձ սիրել: Իմ ճանաչումն այս մեկ տարվա մեջ եղավ, և զգում եմ՝ երբ հայաշատ տեղ եմ գնում, ինձ միանգամից ճանաչում են, ինչի համար ես միայն ուրախ եմ, քանի որ այսքան աշխատանք իզուր չեմ արել»:
Համերգային շրջագայություններ և հրավերներ տարվա ընթացքում շատ է ունեցել: Համերգներով եղել է Բրյուսելում, Հունաստանում, Ամստերդամում։ Առաջիկայում պլանավորում է մեծ համերգ տալ Մոսկվայում։ Համերգի առաջարկ ունի նաև ԱՄՆ-ից. «Առաջին երգիցս հետո համերգների մասնակցելու առաջարկներ շատ եմ ստացել, պարզապես այն ժամանակ չէի կարողանում Ռուսաստանից դուրս գալ, բայց «Աննման յարս» երգից հետո իմ ստեղծագործական կյանքին սկսեցին ավելի շատ հետևել: Անցած տարի համերգային արշավի եմ գնացել մի քանի երգիչների հետ. պարզապես ուզում էի հասկանալ՝ ինչքան են ինձ լսում, և պետք է ասեմ, որ շատ գոհ եմ իմ լսարանից, քանի որ ուր գնացել եմ, արժանացել եմ դրական արձագանքի: Այս տարի ինձ արդեն միայնակ են կանչում համերգների, իսկ ես ունեմ ընտրված երգացանկ, որով կարողանում եմ ներկայանալ: Ի դեպ՝ այս ամառ ուզում եմ բարեգործական համերգով ներկայանալ իմ ծննդավայր Տաշիրում»:
Հայաստանում հաճախ է լինում, այս անգամ եկել է նոր երգեր ձայնագրելու նպատակով. «Ուզում եմ ներկայացնել պոպուրի՝ հին երգերից: Օրինակ՝ շատ սիրում եմ Արամ Ասատրյանի երգերը, որոշ երգեր միքս արված կլինեն: Շուտով նոր երգ էլ կներկայացնեմ, որը «Աննման յարս» երգի շարունակությունն է լինելու: Կարծում եմ՝ դա էլ կսիրվի, գուցե առաջինի պես բում չանի, բայց վստահ եմ՝ կսիրվի»:
Նոր տեսահոլովակ նկարահանել դեռ չի շտապում, անցած տարի ներկայացրել է դուետներ Հռիփսիմե Հակոբյանի և Սուպեր Սաքոյի հետ. «Դուետով ներկայանալու առաջարկներ շատ եմ ստացել, բայց Հռիփսիմեին և Սուպեր Սաքոյին ինքս եմ առաջարկել համատեղ ներկայանալ: Շուտով կլինի ևս մեկ դուետ, բայց փակագծերը չեմ բացի»:
Մեր նկարահանման ժամանակ փողոցում հաճախ էին մոտենում, լուսանկարվում երգչի հետ, ասում է՝ երկրպագուները հաճախ են դրական մեկնաբանություններ գրում. «Անկեղծ ասած՝ ինձ երբեք վատ մեկնաբանություններ չեն գրում: Ես աշխատում եմ կարդալ բոլոր մեկնաբանությունները, երբ Ինստագրամում գրում են, հաճախ պատասխանում եմ: Մի անգամ մի աղջիկ գրել էր․ «Ես զարմանում եմ` ինչպես կարելի է ձեզ լսել», ես էլ պատասխանեցի․ «Անկեղծ ասած՝ ինքս էլ շոկի մեջ եմ»:
Երգչի խոսքով՝ հիմա նախապատրաստվում է մենահամերգի, կարծում է՝ եթե ամեն ինչ լավ լինի, այս տարվա մեջ կունենա իր առաջին մեծ մենահամերգը․ «Ուզում եմ ամեն ինչ լավ անել, կենդանի բենդով ներկայանալ և ինչ-որ նոր աշխատանք անելով կարծես նախապատրաստվում եմ մենահամերգին»:
