«Քարե դարդ»-ում հեռուստադիտողը դերասանուհի Աննա Մանուչարյանին այլ կերպ տեսավ՝ ավելի հումորայի և թեթև ժանրում, չնայած, ինչպես նա է նշում, դրական և բացասական կարծիքները շատ էին, անգամ մի անգամ կարծիք է լսել, որ դժվար կլինի այդ կերպարից դուրս գալ: Դերասանուհին այժմ նկարահանվում է երկու նոր նախագծում, որտեղ ներկայանալու է լրիվ այլ կերպարում: Նոր նախագծերում նկարահանվելու առաջարկ ստանալիս Աննան կարևորում է, թե դերասաններից ովքեր են նկարահանվում, ոչ թե դերասանական խանդի պատճառով, այլ որովհետև սիրում է պրոֆեսիոնալ դերասանների հետ նկարահանվել: BlogNews.am-ը դերասանուհու հետ զրուցել է նոր առաջարկների, բաց տեսարանների, դերասանական պահանջների, ինչպես նաև դստեր հետ հարաբերությունների մասին:
««Քարե դարդ»-ից հետո բազմաթիվ առաջարկներ եմ ստացել և այնպես ստացվեց, որ ընտրելու հնարավորություն ունեի: Հիմա զբաղված եմ երկու նախագծում, որոնք շատ տարբեր են իրարից, և հեռուստադիտողն ինձ կտեսնի լրիվ այլ կերպարում, բայց դեռ փակագծերը չեմ կարող բացել: Այս ընթացքում եղել են առաջարկներ, որոնք մերժել եմ տարբեր պատճառներով․ դրանցից մեկն էլ հոնորարն էր: Իհարկե, ինքնանպատակ չէ մեծ գումար ստանալը, բնականաբար, պետք է հաշվի առնել, թե որքան է զբաղվածությունդ, իսկ մեր աշխատանքը բարդ է, որքան էլ կողքից շատերի համար հեշտ է թվում: Կարևոր է նաև, որ կատարված աշխատանքի համար համապատասխան վճարվես, չնայած հիմա հաճախ են ասում` բյուջեն քիչ է»,- անկեղծանում է դերասանուհին։
Չնայած խնդիրներին՝ եթե հավանում է նախագիծը և դերը` հաշվի առնելով, որ այն կարող է դերասանական աճ գրանցել, զիջումների գնում է. «Սերիալային գործունեության մեջ շատ տարբերվող դերեր չեն լինում, ինչքան էլ տարբեր թվան, հաճախ միանման են: Իհարկե, այս ամենի մեջ դերասանը պետք է կարողանա ճիշտ արդյունքի հասցնել իր ստանձնած կերպարը: Ես կուզեի հնարավորություն ունենալ խաղալու այնպիսի կերպար, որ կարողանայի իմ ամբողջ դերասանական հնարավորությունները ցույց տալ»:
Աննան անկեղծանում է, որ նախագծերից հրաժարվելու հիմնական պատճառներից մեկն էլ չարդարացված բաց և համբույրի տեսարաններն են: Վերջերս էլ հենց նույն պատճառով մերժել է ԱՄՆ մեկնելու և հեռուստանովելում նկարահանվելու առաջարկը. չէր ցանկանա՝ այդ տեսարանները տեսնեին հայրը, եղբայրը, դուստրը. «Չես կարող արհամարել բոլորին և, իհարկե, այն հասարակությանը, որտեղ ապրում ես: Հետո ես շատ վախենում եմ իմ տեսակից դուրս ինչ-որ բան անել և արդյունքում սխալ ընկալվել: Շատ եմ դողում իմ այն արժեքների վրա, որ տարիների ընթացքում կուտակել եմ և չէի ուզի հանկարծ կորցնել: Գուցե գեղարվեստական ֆիլմում համաձայնվեմ, եթե այդ ամենն էսթետիկ նկարահանվի և արդարացված լինի, այլ ոչ թե ինքնանպատակ: Համբույրի տեսարանում էլ չեմ խաղացել և չեմ կարծում, որ կխաղամ, քանի որ վստահ չեմ, որ կարող եմ դա օրգանական անել: Հուսամ` կկարողանամ դեռ շրջանցել այդ պահանջը»:
Բաց տեսարաններում նկարահանվող դերասանուհիներն այսօր առաջարկներ ավելի շատ են ստանում, բայց նրանցից շատերին դիտարկում են որպես բաց տեսարանում խաղացող դերասանուհի: Աննան էլ է դա փաստում. «Իմ ընկերուհի-կոլեգաներից ովքեր խաղացել են բաց տեսարաններում, հաջորդ առաջարկներն ավելի հաճախ են եղել: Ես չէի ցանկանա, որ ինձ դիտարկեին որպես այդպիսի դերասանուհի: Հիմա շատ տարբեր ֆիլմեր են նկարահանվում, մեկում չես նկարահանվի, կլինի մյուսը, բայց կարևոր է, որ ինքդ քեզ հետ ներդաշնակ լինես»:
Չնայած խիտ գրաֆիկին և զբաղվածությանը՝ Աննան հասցնում է ժամանակ տրամադրել ընտանիքին և դստերը. «Աղջիկս չի բողոքում, քանի որ երբ, օրինակ, առաջարկ եմ ստանում նախագծում նկարահանվելու, միշտ ասում եմ, որ երկուշաբթի և հինգշաբթի ինչ-որ ժամերի ես չեմ նկարահանվելու, քանի որ աշխատում եմ իմ աղջկա համար և չեմ կարող ամեն ինչից կտրվել, գնալ, աշխատել և չտեսնել, թե իմ աղջիկն ինչ հաջողությունների է հասել, ինչպես է մեծանում։ Բնականաբար, ես առաջնային տեղը տալիս եմ աղջկաս»:
Ծնողական ժողովների չի գնում, քանի որ մայրը նույն դպրոցում է աշխատում, որտեղ սովորում է դուստրը՝ Արփին. «Ժամանակին գնում էի, բայց անգամ եթե չեմ հասնցում գնալ, միևնույն է, խիղճս հանգիստ է: Դպրոցում մայրիկիս կոլեգաներն են, իսկ Արփիս էլ գերազանց է սովորում, և միշտ գովեստի խոսքեր եմ լսում նրա մասին: Իհարկե, հպարտանում եմ»:
Աննայի դստերը՝ Արփիին, հեռուստադիտողը վերջերս տեսավ «Նվագախմբի երեխաները» նախագծում։ Պարզվում է՝ սա նրա առաջին դերը չէր. «Արփին գեղարվեստական ֆիլմում էր նկարահանվել, ռեժիսորը Նյու Յորքից էր եկել։ Կարճամետրաժ ֆիլմ էր` Սիրիայից փախած հոր և դստեր մասին: Շատ բարդ նկարահանումներ էին, սարսափելի ցուրտ էր, աղջիկս էլ շատ բարակ զգեստով էր, և այնտեղ տեսարան կար, իրբ անձրև է գալիս և աղջկաս ջրում էին։ Սիրտս կանգնում էր, հատկապես երբ ասում էին ևս մի դուբլ: Բայց պետք է խոստովանեմ, որ այնպես չէ, որ դերասանությամբ ոգևորված է, փոխարենը նա պաշտում է պարը: Պարում է հիփ-հոփ և փոփինգ, պատկերացնում է իրեն պարի ոլորտում, չնայած թավջութակ էլ է լավ նվագում: Բնականաբար, որոշել ենք, որ պետք է Կոնսերվատորիայում սովորի, քանի որ սիրով է նվագում թավջութակ և եթե իրեն լավ դրսևորի, հետագայում գուցե կգնա Վիեննա, Գերմանիա՝ ուսումը շարունակելու: Հույս ունեմ, որ հետո մեծ բեմերում կնվագի»:
Վերջաբանի փոխարեն նշենք, որ շատ շուտով Աննային կտեսնեք այլ կարգավիճակում, որը գուցե շատերին կզարմացնի, դե, իսկ բացառիկ մանրամասները դերասանուհին վստահել է BlogNews.am-ին:
Նյութը` Սիրանուշ Գրիգորյանի
